ប្រទេសអេស្ប៉ាញកំពុងប្រឹងប្រែងទប់ទល់នឹងគ្រោះមហន្តរាយទឹកជំនន់ដ៏ធ្ងន់ធ្ងរបំផុតក្នុងរយៈពេលជាច្រើនទសវត្សរ៍ ដោយមនុស្សយ៉ាងហោចណាស់៩៥ នាក់បានស្លាប់ និងរាប់សិបនាក់ទៀតបាត់ខ្លួន បន្ទាប់ពីមានភ្លៀងធ្លាក់យ៉ាងខ្លាំងវាយប្រហារខេត្តភាគខាងកើត ទីក្រុង វ៉ាឡេនសៀ (Valencia) និងនៅតំបន់ផ្សេងទៀត។

ភ្លៀងធ្លាក់យ៉ាងគំហុកកាលពីថ្ងៃអង្គារ បានបង្កជាទឹកជំនន់ដ៏គំហុក ដែលបានហូរកួចនាំស្ពាន និងអគារទៅតាមកម្លាំងទឹក និងបង្ខំមនុស្សឱ្យឡើងលើដំបូល ឬតោងដើមឈើដើម្បីរស់។

លោកនាយករដ្ឋមន្ត្រី Pedro Sanchez បានប្រកាសកាន់ទូទាំងប្រទេសរយៈពេលបីថ្ងៃ ខណៈ ស្ថានភាពធ្ងន់ធ្ងរនៅតែបន្ត ដោយមានវិធានការរឹតត្បិតលើកិច្ចខិតខំប្រឹងប្រែងជួយសង្គ្រោះមួយចំនួន។

រដ្ឋាភិបាលនិយាយថា ចំនួនអ្នកស្លាប់ត្រូវគេបារម្ភថានឹងកើនឡើង ខណៈមានអ្នកបាត់ខ្លួនជាច្រើន។

មនុស្សយ៉ាងហោចណាស់៩២ នាក់ត្រូវបានកត់ត្រានៅក្នុងទីក្រុងវ៉ាឡេនសៀ ដោយពីរនាក់ទៀតនៅ តំបន់ស្វយ័ត ខាស្ទីឡា -ឡា ម៉ាន់ចា (Castilla-La Mancha) ទៅភាគខាងលិចរបស់ទីក្រុង       វ៉ាឡេនសៀ និងម្នាក់ទៀតនៅនៅតំបន់ម៉ាឡាហ្កា(Málaga) ជាបុរសជនជាតិអង់គ្លេសវ័យ៧១ឆ្នាំដែលបានស្លាប់នៅក្នុងមន្ទីរពេទ្យបន្ទាប់ពីត្រូវបានជួយសង្គ្រោះពីផ្ទះរបស់លោក។

ចំនួនអ្នកស្លាប់ដោយសារទឹកជំនន់នៅពេលនេះ គឺជាចំនួនដ៏ច្រើនបំផុតរបស់ប្រទេសនេះ ចាប់តាំងពីឆ្នាំ១៩៧៣មក នៅពេលមនុស្សយ៉ាងហោចណាស់ ១៥០ នាក់ត្រូវបានគេសន្និដ្ឋានថាបានស្លាប់ ក្នុងគ្រោះទឹកជំនន់ដ៏មហន្តរាយបំផុតមិនធ្លាប់មានរបស់ប្រទេសនេះនៅភាគអាគ្នេយ៍៕