​បាល់ទាត់៖ ​ខ្សែបម្រើ​យុវជន​អេ​ស្ប៉ា​ញ Pedri បាន​យល់ព្រម​បន្ត​កិច្ចសន្យា​ជាមួយ Barcelona ដែល​មាន​សុពលភាព​រហូតដល់​ឆ្នាំ​២០២៦ អម​ជាមួយ​តម្លៃ​ផ្តាច់​កុងត្រា ១ពាន់​លាន​អឺរ៉ូ​ផង​ដែរ នេះ​បើ​តាម​សេចក្តី​ប្រកាស​របស់​ក្លិប​។ ​​កីឡាករ​វ័យ ១៨​ឆ្នាំ​រូបនេះ​នឹង​ចុះហត្ថលេខា​បន្ត​កិច្ចសន្យា​ថ្មី​នៅ​ថ្ងៃ​សុក្រ​នេះ ដែល​កិច្ចសន្យា​ថ្មី​នឹង​មាន​សុពលភាព​រហូតដល់​ថ្ងៃទី៣០ ខែមិថុនា ​ឆ្នាំ២០២៦​។

Pedri បាន​ផ្លាស់​មកកាន់ Barcelona ពី Las Palmas កាលពី​ខែសីហា​ ឆ្នាំ២០២០ និង​បាន​បង្ហាញខ្លួន​ដល់​ទៅ ៥៣ប្រកួត​រដូវ​កាល​មុន ច្រើន​ជាង​កីឡាករ​ផ្សេងទៀត​នៅ Barcelona ត្រឹម​វ័យ ១៧ឆ្នាំ​ប៉ុណ្ណោះ​។ Pedri ក៏​ជា​សមាជិក​របស់​ក្រុម​ជំរើសជាតិ​អេ​ស្ប៉ា​ញ​ផងដែរ​នៅ​ព្រឹត្តិការណ៍ Euro ២០២០ កន្លងទៅ​។ ​អ្នកចាត់ការ​ក្រុម​ជំរើសជាតិ​អេ​ស្ប៉ា​ញ​លោក Luis Enrique តែងតែ​ដាក់ Pedri ឱ្យ​ចាប់ផ្តើម ១១នាក់​គ្រប់​ប្រកួត​ទាំងអស់​នៅ Euro ២០២០ នោះ​។ ​Pedri ក៏បាន​ជាប់​ក្នុង​ជំរើស ១១នាក់​ល្អ​បំផុត​ប្រចាំ​ព្រឹត្តិការណ៍ Euro ផងដែរ​។ ​​ក្រៅពីនេះ Pedri ក៏​ជា​សមាជិក​របស់​អេ​ស្ប៉ា​ញ​នៅ​អូឡាំពិក​ទីក្រុង​តូ​ក្យូ​ផងដែរ​ ដែល​អេ​ស្ប៉ា​ញ​ឈ្នះ​មេដាយប្រាក់​ក្រោយ​ចាញ់​ប្រេ​ស៊ី​ល​នៅ​វគ្គ​ផ្តាច់ព្រ័ត្រ​។ ​រដូវ​កាល​នេះ​ទៀតសោត Pedri បានបង្ហាញ​ខ្លួន ៤លើក​ឱ្យ Barcelona ដែល​កំពុងមាន​វិបត្តិ​ហិរញ្ញវត្ថុ ខណៈ​ទំរង់​លេង​ក៏​ធ្លាក់ចុះធ្លាក់​ដល់​លេខ៧ ក្នុង​តារាង La Liga និង​បាត​ពូ​ល​នៅ UEFA Champions League ថែមទៀត​៕

​អត្ថបទ​៖​នាង សុភា​វុ​ធ