ក្រុមសិទ្ធិមនុស្ស ដែលមានមូលដ្ឋាននៅទីក្រុងសេអ៊ូល បាននិយាយនៅថ្ងៃព្រហស្បតិ៍ (៣១ តុលា) នេះថា ជនជាតិកូរ៉េខាងជើង ជាង ១០០នាក់ បានបាត់ខ្លួន បន្ទាប់ពីត្រូវបានចាប់ដោយនគរបាលសម្ងាត់ ក្នុងពេលព្យាយាមរត់ចេញពីប្រទេស ឬដោយគ្រាន់តែព្យាយាមទូរសព្ទទៅរកសាច់ញាតិនៅកូរ៉េខាងត្បូង។

ក្រុមការងារយុត្តិធម៌អន្តរកាល (TJWG) បានចេញផ្សាយរបាយការណ៍ ដែលរៀបរាប់លម្អិតពីគំរូនៃការបាត់ខ្លួនដោយបង្ខំ តាមរយៈការសិក្សារបស់ខ្លួន ផ្អែកលើការសម្ភាសជាមួយអ្នករត់ចោលស្រុកកូរ៉េខាងជើងចំនួន ៦២នាក់ នៅកូរ៉េខាងត្បូង។

ប្រជាជនកូរ៉េខាងជើងរាប់ម៉ឺននាក់ បានរត់ចោលប្រទេស ក្នុងរយៈពេលជាច្រើនទសវត្សរ៍ ចាប់តាំងពីសង្គ្រាមកូរ៉េ បានបញ្ចប់នៅឆ្នាំ១៩៥៣ ជាមួយនឹងបទឈប់បាញ់ ដោយអ្នកទាំងនោះភាគច្រើនត្រូវបានចាប់ខ្លួន ឬធ្វើមាតុភូមិនិវត្តន៍ទៅកាន់ជំរំពន្ធនាគារ ឬកន្លែងឃុំឃាំងផ្សេងទៀត មុនពេលដោះលែង។

ក្រុមសិទ្ធិមនុស្ស TJWG បានកំណត់អត្តសញ្ញាណមនុស្សចំនួន ១១៣នាក់ ក្នុងសំណុំរឿងបាត់ខ្លួនចំនួន ៦៦ករណី ហើយក្នុងចំណោមអ្នកទាំងនេះ មាន ៨០% ឬស្មើនឹង ៩០នាក់ ត្រូវបានចាប់ខ្លួននៅខាងក្នុងកូរ៉េខាងជើង និងនៅសល់ត្រូវចាប់ក្នុងប្រទេសចិន ឬរុស្ស៊ី ដែលមានប្រហែល ៣០% បានបាត់ខ្លួនចាប់តាំងពីមេដឹកនាំ លោក គីម ជុងអ៊ុន ឡើងកាន់អំណាចនៅចុងឆ្នាំ២០១១ មក៕