នៅថ្ងៃព្រហស្បតិ៍នេះ យន្តហោះពិបាកហោះឡើង និងចុះចតនៅអាកាសយានដ្ឋានអន្តរជាតិ Taoyuan ដោយសារខ្យល់បក់ខ្លាំងបង្កឡើងពីព្យុះទីហ្វុង Kong-rey ។

ព្យុះ Kong-rey បានបោកបក់ដល់ដីគោកនៅតំបន់ឆ្នេរភាគខាងកើតកោះតៃវ៉ាន់នាថ្ងៃព្រហស្បតិ៍នេះ ក្នុងនាមជាព្យុះធំបំផុតគិតពីទំហំ បានវាយប្រហារកោះតៃវ៉ាន់ក្នុងរយៈពេល ៣០ឆ្នាំកន្លងមកនេះ បណ្តាលបិទផ្សារហិរញ្ញវត្ថុ ជើងហោះហើររាប់រយវ៉ុល ត្រូវបានលុបចោល និងការកាត់បន្ថយសេវាកម្មរថភ្លើងផងដែរ ។

នាយកដ្ឋានពន្លត់អគ្គិភ័យកោះតៃវ៉ាន់ រាយការណ៍ថា មនុស្សម្នាក់ បានស្លាប់ ពេលដែលរថយន្តធំរបស់ពួកគេ បើកបុកដើមឈើបាក់នៅភាគកណ្តាលកោះតៃវ៉ាន់ ។

រដ្ឋាភិបាលកោះតៃវ៉ាន់ និយាយថា ព្យុះទីហ្វុងនេះ បានកាត់ផ្តាច់ការផ្គត់ផ្គង់ចរន្តអគ្គិសនីដល់មនុស្សជិតកន្លះលានគ្រួសារ ។

យោងតាមការអះអាងរបស់រដ្ឋបាលឧតុនិយមកណ្តាលកោះតៃវ៉ាន់ បានឲ្យដឹងថា ព្យុះទីហ្វុង Kong-rey បានវាយប្រហារតំបន់ភ្នំ និងស្រុកតំបន់ឆ្នេរភាគខាងកើត Taitung ដែលមានមនុស្សរស់នៅច្រើនកុះករ ហើយខ្យល់បក់ និងភ្លៀងធ្លាក់ខ្លាំង បានធ្វើឲ្យប៉ះពាល់តំបន់ស្ទើទាំងអស់នៅលើកោះមួយនេះ ៕