មនុស្ស ៥នាក់ត្រូវបានសម្លាប់ រួមទាំងកម្មករបរទេស ៤នាក់ និងកសិករអ៊ីស្រាអែលម្នាក់ នៅក្នុងការវាយប្រហារដោយមីស៊ីលរបស់ក្រុមហេសបូឡាលើទីក្រុងភាគខាងជើង Metula របស់អ៊ីស្រាអែលនៅថ្ងៃព្រហស្បតិ៍នេះ ។ ក្រុមប្រឹក្សាក្នុងតំបន់នៃទីក្រុង Metula បានរាយការណ៍ការវាយប្រហារនេះ ។

ក្រុមហេសបូឡាលីបង់ បានវាយប្រហារគ្រាប់រ៉ុក្កែតរាប់ពាន់គ្រាប់ចូលទៅក្នុងប្រទេសអ៊ីស្រាអែល ចាប់តាំងពីថ្ងៃទី ៨ ខែតុលា ឆ្នាំ ២០២៣រហូតមក ពេលដែលពួកគេបើកការវាយប្រហារ ដើម្បីបង្ហាញសាមគ្គីភាពជាមួយក្រុមហាម៉ាស់ រយៈពេល ១ថ្ងៃប៉ុណ្ណោះ ក្រោយការវាយប្រហារឆ្លងព្រំដែនរបស់ក្រុមជីវពលប្រដាប់អាវុធប៉ាឡេស្ទីនមួយនេះ ចេញពីតំបន់ហ្កាហ្សា ។

សង្រ្គាមពេញបន្ទុក បានផ្ទុះឡើងកាលពីខែមុន ពេលដែលអ៊ីស្រាអែលបើការវាយប្រហារតាមច្រកអាកាសទ្រង់ទ្រាយធំ និងបានសម្លាប់មេដឹកនាំក្រុមហេសបូឡាលោក Hassan Nasrallah និងសមាជិកភាគច្រើននៃមេបញ្ជាការជាន់ខ្ពស់របស់គាត់ ។

ខណៈពេលនោះដែរ អ៊ីស្រាអែល បានចេញការព្រមានឲ្យជម្លៀសខ្លួនអ្នកស្រុកចេញពីទីក្រុង Baalbek ស្ថិតនៅតំបន់ភាគខាងកើតលីបង់ សម្រាប់រយៈពេល ២ថ្ងៃជាប់ៗគ្នា ។

កាលពីថ្ងៃពុធ ពួកគេ បានបើកការវាយប្រហារតាមច្រកអាកាសយ៉ាងខ្លាំងក្លាលើគោលដៅរបស់ក្រុមហេសបូឡានៅក្នុងទីក្រុងមួយនេះ ដែលជាទីក្រុងសម្បូរដោយប្រាសាទរ៉ូម៉ាំង ។

ក្រុមហេសបូឡា និយាយថា ពួកគេក៏បានបើកការវាយប្រហារដោយគ្រាប់រ៉ុក្កែត និងគ្រាប់កាំភ្លើងធំលើកងកម្លាំងអ៊ីស្រាអែលនៅជិតទីក្រុងភ្នំយុទ្ធសាស្រ្តភាគខាងត្បូង Khiyam ៕