អាជ្ញាធរ និយាយកាលពីថ្ងៃព្រហស្បតិ៍ថា មនុស្សយ៉ាងហោចណាស់៣២១នាក់ បានស្លាប់ និងជាង ៧៤០.០០០នាក់ផ្សេងទៀត បានភៀសខ្លួនចេញនៅក្នុងប្រទេសនីហ្សេរីយ៉ា រហូតមកដល់ពេលនេះក្នុងឆ្នាំនេះ ដោយសារតែទឹកជំនន់ បានបំផ្លាញផ្នែកភាគច្រើនរបស់ប្រទេស។

លើសពីនេះ មនុស្សប្រហែល ២.៨៥៤នាក់ បានរងរបួសដោសារទឹកជំនន់ដែលបណ្តាលមកពីភ្លៀងធ្លាក់អូសបន្លាយពេលនៅទូទាំងប្រទេសអាហ្វ្រិកដែលមានប្រជាជនច្រើនបំផុតមួយនេះ។

លោក Chukwuma Soludo អភិបាលរដ្ឋ Anambra ភាគអាគ្នេយ៍ បានប្រាប់អ្នកសារព័ត៌មាននៅរដ្ឋធានី Abuja បន្ទាប់ពីកិច្ចប្រជុំក្រុមប្រឹក្សាសេដ្ឋកិច្ចជាតិប្រចាំខែ ដែលចូលរួមដោយលោក Kashim Shettima អនុប្រធានាធិបតីថា ប្រទេសនីហ្សេរីយ៉ាកំពុងប្រឈមមុខនឹងភាពអាសន្នជាតិទាក់ទងនឹងទឹកជំនន់ ហើយរបាយការណ៍ជាច្រើន រហូតមកដល់ពេលនេះ ក្នុងឆ្នាំនេះ បានកំណត់អត្តសញ្ញាណគ្រោះមហន្តរាយជាតិដ៏ធំមួយដោយសារតែភ្លៀងធ្លាក់ខ្លាំង នាំឱ្យមានការជម្លៀសប្រជាជន ការបាត់បង់អាយុជីវិតប្រជាជន និងការបំផ្លិចបំផ្លាញលំនៅឋាន ព្រមទាំងជីវភាពរស់នៅ។

មន្ត្រីជាន់ខ្ពស់ម្នាក់ បាននិយាយថា រដ្ឋចំនួន៣៤ក្នុងចំណោមរដ្ឋចំនួន៣៦របស់ប្រទេសនីហ្សេរីយ៉ា បានជួបប្រទះគ្រោះទឹកជំនន់ ហើយតំបន់ចំនួន២១៧ក្នុងចំណោមតំបន់៧៧៤តំបន់របស់រដ្ឋាភិបាល បានរងផលប៉ះពាល់។