អាជ្ញាធររដ្ឋ ស៊ីណាឡូអា (Sinaloa) នៃប្រទេសម៉ិកស៊ិក នៅយប់ថ្ងៃព្រហស្បតិ៍ (៣១ តុលា) បានបញ្ជាកុំឱ្យអ្នកស្រុក ពាក់ម៉ាស់ របាំងមុខ ឬស្លៀកសំលៀកបំពាក់សម្រាប់ពិធីបុណ្យខ្មោច ហាឡូវីន (Halloween) ដើម្បីជៀសវាងការភ័ន្តច្រឡំជាមួយឧក្រិដ្ឋជន ស្របពេលមានកំណើននៃអំពើហិង្សាក្រុមជួញដូរគ្រឿងញៀនកាន់តែអាក្រក់ទៅៗ។

ដោយជាជម្រករបស់ក្រុមឧក្រិដ្ឋជន Sinaloa ដ៏មានអំណាច រដ្ឋភាគពាយ័ព្យមួយនេះត្រូវបានវាយលុកដោយការប្រយុទ្ធគ្នាយ៉ាងបង្ហូរឈាមរវាងក្រុមជនអន្ធពាល បន្ទាប់ពីការចាប់ខ្លួនមេក្រុមជួញដូរគ្រឿងញៀនដ៏មានឥទ្ធិពល ឈ្មោះ អ៊ីស្មែល ហ្សាំបាដា (Ismael Zambada) ឬហៅថា អ៊ែលម៉ាយ៉ូ (El Mayo) នៅសហរដ្ឋអាមេរិក កាលពីចុងខែកក្កដា។

ប្រមុខសន្តិសុខរដ្ឋ លោក ហ្កេរ៉ាដូ មើរីដា (Gerardo Merida) បានប្រាប់អ្នកស្រុកនៅក្នុងសន្និសីទសារព័ត៌មានកាលពីថ្ងៃពុធថា "កុំស្លៀកសំលៀកបំពាក់ ឬរបាំងមុខ កាន់កាំភ្លើងផ្លាស្ទិក ឬស្លៀកពាក់ដូចនរណាម្នាក់ឱ្យសោះ ជៀសវាងការភ័ន្តច្រលំ" ដោយព្រមានអ្នកស្រុកកុំឱ្យចេញទៅក្រៅនៅពេលយប់។

សង្គ្រាមផ្ទៃក្នុងក្រុមឧក្រិដ្ឋកម្មបានធ្វើឱ្យមនុស្សរាប់រយនាក់ស្លាប់ ឬបាត់ខ្លួនចាប់តាំងពីខែកញ្ញា ហើយរដ្ឋាភិបាលសហព័ន្ធបានដាក់ពង្រាយទាហានរាប់រយនាក់ទៅកាន់តំបន់នោះ ក្នុងកិច្ចប្រឹងប្រែងស្ដារសន្តិសុខឡើងវិញ៕