ជាងមួយឆ្នាំទៅក្នុងសង្រ្គាមដែលបានបង្កភាពតានតឹងពាសពេញមជ្ឈិមបូព៌ា កងទ័ពអ៊ីស្រាអែល នៅតែបន្តប្រយុទ្ធក្នុងសង្រ្គាមដែលហាក់មិនចេះចប់ជាមួយក្រុមហាម៉ាស នៅក្នុងផ្នែកភាគខាងជើងដែលត្រូវបានបំផ្លាញយ៉ាងធ្ងន់ធ្ងរបំផុត និងដាច់ស្រយាលខ្លាំងនៃតំបន់ហ្កាហ្សាស្ទ្រីប។

ជម្លោះនេះបានអូសទាញក្រុមសកម្មប្រយុទ្ធជាច្រើនចាប់ពីលីបង់ ទៅដល់យេម៉ែន ហើយអ្នកឧបត្ថម្ភសំខាន់របស់ពួកគេគឺអ៊ីរ៉ង់ ក៏បានឈានចូលកាន់តែកៀកទៅនឹងសង្រ្គាមដ៏រ៉ាំរ៉ៃជាមួយអ៊ីស្រាអែលផងដែរ។ នៅភាគខាងជើងហ្កាហ្សា សង្គ្រាមហាក់ជាប់គាំងក្នុងរង្វង់នៃការវាយលុករបស់អ៊ីស្រាអែល តាមប្រម៉ាញ់ដោយក្រុមយុទ្ធជនហាម៉ាស ដែលបានប្រមូលផ្ដុំគ្នាឡើងវិញ៕

នៅតំបន់ហ្កាហ្សាភាគខាងជើង ក្រុមសកម្មប្រយុទ្ធហាម៉ាស បានប្រើយុទ្ធសាស្រ្តវាយហើយរត់ ចេញពីអគារដែលត្រូវបានទម្លាក់គ្រាប់បែក។ អ្នកស្រុកនិយាយថា កងកម្លាំងអ៊ីស្រាអែល បានវាយឆ្មក់ជម្រកជនភៀសខ្លួន ដោយប្រើកាំភ្លើងបង្ខំមនុស្សឱ្យចាកចេញ។ អ្នករាយការណ៍ព័ត៌មាននិយាយថា ពួកគេស្ទើរតែមិនអាចប្រតិបត្តិការបានដោយសារតែការទម្លាក់គ្រាប់បែករបស់អ៊ីស្រាអែល។

ចាប់តាំងពីការវាយប្រហារកាលពីថ្ងៃទី០៧ ខែតុលា លើអ៊ីស្រាអែល ដែលបានបង្កឱ្យមានសង្គ្រាមហ្កាហ្សាមក ក្រុមហាម៉ាស បានរងខាតបង់យ៉ាងធ្ងន់ធ្ងរ។ ការសម្លាប់មេដឹកនាំរបស់ខ្លួន លោក Yahya Sinwar នាពេលថ្មីៗនេះ ត្រូវបានគេមើលឃើញថាអាចជាចំណុចប្រែប្រួលដ៏សំខាន់ ប៉ុន្តែបទឈប់បាញ់រវាងភាគីទាំងពីរមិនទាន់លេចចេញជារូបរាងនៅឡើយ ហើយក្រុមហាម៉ាស ដែលនៅតែមានចំណាប់ថ្នូរជាច្រើននាក់ និងនៅតែជាអំណាចគ្រប់គ្រងនៅតំបន់ហ្កាហ្សា៕