ក្រុមជួយសង្រ្គោះ បន្តស្វែងរកអ្នកបាត់ខ្លួននៅក្នុងប្រទេសអេស្ប៉ាញ ក្រោយមនុស្សយ៉ាងហោច ១៥៨នាក់ បានស្លាប់នៅក្នុងគ្រោះមហន្តរាយទឹកជំនន់ដ៏អាក្រក់បំផុតនៅក្នុងប្រទេសមួយនេះ ក្នុងប្រវត្តិសាស្រ្តនាសម័យទំនើប ។

រដ្ឋាភិបាលអេស្ប៉ាញ និយាយថា មនុស្សរាប់សិបនាក់ នៅបាត់ខ្លួន ក្រោយភ្លៀងធ្លាក់រយៈពេល៨ម៉ោងបង្កជាទឹកជំនន់ដ៏គំហក់នៅតំបន់ Valencia កាលពីថ្ងៃអង្គារ ។

នៅក្នុងទីក្រុង Paiporta ដែលជាចំណុកកណ្តាលនៃគ្រោះមហន្តរាយទឹកជំនន់ មនុស្សម្នានាំគ្នាដើរកាត់រថយន្តខូចខាត និងកម្ទេចកម្ទី ខណៈដែលអ្នកស្រុក ព្យាយាមបោសសម្អាតផ្លូវ ។

អ្នកស្រី Isabel Seradilla គឺជាពលរដ្ឋមួយរូបរស់នៅក្នុងតំបន់ Valencia និយាយថា អ្នកស្រីពិតជាសំណាងខ្លាំងណាស់ បាននៅរស់រាន ។

អ្នកស្រីនិយាយថា ទឹកបានឡើងដល់ត្រឹមក. ។ បើសិនជាវាមិនមែនជាអ្នកជិតខាងខ្ញុំទេ ខ្ញុំនឹងមិននិយាយរឿងនេះនោះទេ ។

នៅតំបន់ Valencia អ្នកស្រុកនិយាយថា ការព្រមានបានកើតមានយឺតយ៉ាវខ្លាំងពេក ហើយចំនួនមនុស្សស្លាប់ គួរតែចៀសផុត ។

ខណៈពេលនោះដែរ នាយករដ្ឋមន្រ្តីអេស្ប៉ាញលោក Pedro Sanchez បានជំរុញឲ្យប្រជាពលរដ្ឋនៅតំបន់រងការជន់លិច បន្តស្នាក់នៅក្នុងផ្ទះ ដោយសារការគំរាមកំហែងពីអាកាសធាតុព្យុះបន្ថែមទៀត ។

លោកនិយាយថា រដ្ឋាភិបាលរបស់លោកនឹងបន្តផ្តល់ធនធានដើម្បីស្វែងរកអ្នកបាត់ខ្លួន ដរាបណាគេត្រូវការ ។

ដោយឡែក ក្រុមប្រឆាំងបានចោទប្រកាន់រដ្ឋាភិបាលកណ្តាលថាយឺតយ៉ាវខ្លាំងក្នុងការព្រមានដល់អ្នកស្រុក និងបញ្ជូនក្រុមជួយសង្រ្គោះទៅជួយពួកគេ ៕