មានមនុស្សស្លាប់ ២នាក់ ខណៈ ៦នាក់ទៀត បានរងរបួស នៅក្នុងហេតុការណ៍បាញ់ប្រហារ នៅកណ្តាលទីក្រុង Orlando រដ្ឋ Florida សហរដ្ឋអាមេរិក ចំពេលមានការរៀបចំពិធីបុណ្យ Halloween។ នេះបើតាមសេចក្ដីរាយការណ៍សារព័ត៌មានក្នុងស្រុកជាច្រើន នាថ្ងៃសុក្រ (ទី១ ខែវិច្ឆិកា) នេះ ដោយបន្ថែមថា ជនសង្ស័យវ័យជំទង់ម្នាក់ត្រូវបានចាប់ខ្លួន។

មនុស្សម្នា ដែលស្ថិតក្នុងសម្លៀកបំពាក់នៃពិធី Halloween បានឈរនៅក្នុងតំបន់កើតហេតុការណ៍នោះ ខណៈដែលបុគ្គលិកសង្គ្រោះបន្ទាន់ បានទៅដល់ទីនោះ ជាកន្លែងដែលជនរងគ្រោះដេកដួលនៅលើផ្លូវ ដោយត្រូវបានឃើញតាមរយៈវីដេអូដែលបានបង្ហោះលើបណ្ដាញសង្គម Instagram ដែលត្រូវបានផ្ទៀងផ្ទាត់ដោយសារព័ត៌មាន Reuters។ ប្រព័ន្ធផ្សព្វផ្សាយក្នុងស្រុករបស់សហរដ្ឋអាមេរិក បានរាយការណ៍ថា អ្នករងរបួសត្រូវបានបញ្ជូនទៅមន្ទីរពេទ្យ ហើយស្ថិតក្នុងស្ថានភាពមានស្ថិរភាព។

ការបាញ់ប្រហារនេះ បានកើតឡើងនាពេលយប់ជ្រៅ នៅក្នុងសង្កាត់កម្សាន្តពេលរាត្រី Orlando ជាកន្លែងដែលមនុស្សរាប់រយនាក់ កំពុងប្រារព្ធពិធីបុណ្យ Halloween។ ប្រព័ន្ធផ្សព្វផ្សាយ CNN រាយការណ៍ថា ស្នងការនគរបាលទីក្រុង Orlando លោក Eric Smith បានប្រាប់សន្និសីទសារព័ត៌មានថា ជនត្រូវបានចោទប្រកាន់ជាខ្មាន់កាំភ្លើង ដែលជាក្មេងប្រុសអាយុ ១៧ឆ្នាំ ត្រូវបានចាប់ខ្លួន។ រូបគេកំពុងត្រូវបានសាកសួរដោយក្រុមភ្នាក់ងារស៊ើបអង្កេត៕