មន្រ្តីនគរបាលមួយរូប និយាយថា មនុស្សយ៉ាងហោច ៧នាក់ រួមទាំងសិស្សសាលា ៥នាក់ផងដែរ ត្រូវបានសម្លាប់ និងមនុស្ស ២៣នាក់ផ្សេងទៀត បានរងរបួស ក្នុងហេតុការណ៍ផ្ទុះគ្រាប់នៅតំបន់ភាគនិរតីប្រទេសប៉ាគីស្ថាន ។

លោកនិយាយថា គោលដៅវាយប្រហារគឺជារថយន្តនគរបាលដែលធ្វើដំណើរទៅទទួលក្រុមចាក់វ៉ាក់សាំងបង្ការជំងឺខួរឆ្អឹងខ្នង ។ នគរបាលម្នាក់ ស្ថិតក្នុងចំណោមអ្នកស្លាប់ ខណៈដែលមនុស្ស និងក្រុមមន្រ្តី ២៣នាក់ផ្សេងទៀត រងរបួស ។

លោកបន្តថា ការផ្ទុះនេះ ចេញពីគ្រឿងផ្ទុះដែលបង្កប់នៅក្នុងទោចចក្រយានយន្តមួយគ្រឿងដែលចតចោលនៅជិតសាលារៀនសម្រាប់ក្មេងស្រី ស្ថិតក្នុងទីក្រុង Mastung ។

នៅមិនទាន់មានភាគីណាមួយប្រកាសទទួលស្គាល់ភ្លាមៗនោះទេ សម្រាប់ការវាយប្រហារមួយនេះ ។

ខណៈពេលនោះដែរ នាយរដ្ឋមន្រ្តីប៉ាគីស្ថានលោក Shehbaz Sharif បានថ្កោលទោសការវាយប្រហារនេះ នៅក្នុងសេចក្តីថ្លែងកាណ៍ ។

ប៉ាគីស្ថាន បានមើលឃើញការកញ្ជ្រោលឡើងនៃការវាយប្រហាររបស់ក្រុមជីវពលនៅតំបន់ភាគពាយ័ព្យ និងការបះបោរកើនឡើងរបស់ក្រុមផ្តាច់ខ្លួននៅតំបន់ភាគខាងត្បូង ។

កាលពីថ្ងៃអង្គារ នគរបាលម្នាក់ ត្រូវបានសម្លាប់ នៅក្នុងការវាយប្រហារលើការិយាល័យសុខភាពដែលគ្រប់គ្រងយុទ្ធនាការចាក់វ៉ាក់សាំងបង្ការជំងឺខួរឆ្អឹងខ្នងតាមផ្ទះ ៕