ប្រភពពីអ្នកនយោបាយលីបង់ និងអ្នកការទូតជាន់ខ្ពស់ម្នាក់ បានប្រាប់ឲ្យដឹងថា សហរដ្ឋអាមេរិកបានស្នើឲ្យប្រទេសលីបង់ប្រកាសបទឈប់បាញ់ជាឯកតោភាគីជាមួយអ៊ីស្រាអែល ដើម្បីធ្វើឲ្យដំណើរការឡើងវិញនូវកិច្ចចរចាដែលជាប់គាំង ដើម្បីបញ្ចប់អរិភាព រវាងអ៊ីស្រាអែល និងក្រុមហេសបូឡា ដែលការអះអាងនេះត្រូវបានបបដិសេធដោយនាយករដ្ឋមន្ត្រីលីបង់។

ពួកគេបាននិយាយថា ការស្នើនេះត្រូវបានប្រេសិតអាមេរិក លោក Amos Hochstein ទាក់ទងទៅកាន់នាយករដ្ឋមន្ត្រីចាំផ្ទះលីបង់ លោក Najib Mikati ក្នុងសប្តាហ៍នេះ ខណៈដែលសហរដ្ឋអាមេរិកបានបង្កើនកិច្ចខិតខំប្រឹងប្រែងការទូត ដើម្បីឲ្យមានបទឈប់បាញ់ រវាងអ៊ីស្រាអែល និងក្រុមសកម្មប្រយុទ្ធហេសបូឡា ដែលគាំទ្រដោយអ៊ីរ៉ង់។

តែយ៉ាងណាក្ដី ការិយាល័យរបស់លោក Mikati នៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មាន Reuters បានបដិសេធថា សហរដ្ឋអាមេរិកមិនបានស្នើសុំឲ្យប្រទេសលីបង់ប្រកាសបទឈប់បាញ់ជាឯកតោភាគីនោះទេ។ សេចក្ដីថ្លែងការាណ៍នោះ បានបន្ថែមថា ជំហររបស់រដ្ឋាភិបាល គឺច្បាស់លាស់ក្នុងការស្វែងរកបទឈប់បាញ់ពីភាគីទាំងសងខាង និងការអនុវត្តសេចក្ដីសម្រេច 1701 របស់ក្រុមប្រឹក្សាសន្តិសុខអង្គការសហប្រជាជាតិ ដែលបានបញ្ចប់ជម្លោះចុងក្រោយ រវាងសត្រូវទាំង២ ក្នុងឆ្នាំ២០០៦។

ពាក់ព័ន្ធនឹងការលើកឡើងនេះ ស្ថានទូតអាមេរិក ប្រចាំនៅទីក្រុងបេរូត មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕