ភ្នំពេញ៖ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានស្នើដល់ធនាគារអភិវឌ្ឍន៍អាស៊ី(ADB) បន្តផ្តល់ការគាំទ្រលើគម្រោងអភិវឌ្ឍក្នុងវិស័យប្រៃសណីយ៍ទូរគមនាគមន៍ និងបច្ចេកវិទ្យាគមនាគមន៍ និងព័ត៌មានបន្ថែមទៀតដល់កម្ពុជា។ នេះបើតាមក្រសួងប្រៃសណីយ៍ និងទូរគមនាគមន៍ផ្ស ព្វផ្សាយនៅក្នុងហ្វេសប៊ុកផ្ទាល់របស់ក្រសួង។

ប្រភពដដែលបញ្ជាក់បន្ថែមថា ការស្នើសុំរបស់កម្ពុជាទៅ ADB បែបនេះត្រូវបានធ្វើឡើងនៅក្នុងជំនួបពិ ភាក្សារវាងឯកឧត្ដមរដ្ឋមន្ត្រីក្រសួងប្រៃសណីយ៍ និងទូរគមនាគមន៍ជាមួយនឹងលោកស្រី Sunniya Durany-Jamel នាយិកាធនាគារអភិវឌ្ឍន៍អាស៊ី(ADB)ប្រចាំកម្ពុជា កាលពីថ្ងៃទី១៤ ខែតុលា ឆ្នាំ២០ ២១។

នៅក្នុងជំនួបនេះដែរលោកស្រីនាយិកាធនាគារអភិវឌ្ឍន៍អាស៊ី ក៏បានថ្លែងអំណរគុណចំពោះឯកឧត្តមរដ្ឋមន្រ្តី និងសហការីនៃក្រសួងប្រៃសណីយ៍ និងទូរគមនាគមន៍ ដែលបានផ្តល់កិច្ចសហការយ៉ាងជិតស្និទ្ធជាមួយ ADB ក្នុងការអនុវត្តគម្រោងអភិវឌ្ឍន៍នៅក្នុងវិស័យក្រោមសមត្ថកិច្ចគ្រប់គ្រងរបស់ក្រសួង​ ហើយក៏បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួង ក្នុងការជំរុញការអភិវឌ្ឍន៍វិស័យទាំងនេះផងដែរ៕​ ដោយ៖ គង់ ឌិន