រុស្ស៊ី៖ ក្រសួងការពារជាតិរុស្ស៊ីបាននិយាយថា នាវាពិឃាតរបស់រុស្ស៊ីមួយគ្រឿងកាលពីថ្ងៃសុក្រ បានរារាំងនាវាពិឃាតរបស់កងទ័ពជើងទឹកសហរដ្ឋអាមេរិក ពីអ្វីដែលខ្លួនបានចាត់ទុកថា ជាការប៉ុនប៉ងចូលលុកលុយនៅក្នុងដែនទឹករបស់រុស្ស៊ីនៅសមុទ្រជប៉ុន។ ហេតុការណ៍នេះបានកើតឡើង ខណៈរុស្ស៊ី និងចិនបានធ្វើសមយុទ្ធកងទ័ពជើងទឹករួមគ្នានៅក្នុងតំបន់នេះ។
ក្រសួងបាននិយាយថា នាវាពិឃាត Admiral Tributs របស់កងទ័ពជើងទឹករុស្ស៊ីបានចូលទៅជិតនាវាពិឃាតសហរដ្ឋអាមេរិក USS Chafee ដើម្បីបង្ខំឲ្យនាវាចេញពីតំបន់ក្បែរដែនទឹកប្រទេសរុស្ស៊ី ដែលត្រូវបានប្រកាសបិទការដឹកជញ្ជូនដោយសារតែសមយុទ្ធកាំភ្លើងធំរបស់ប្រទេសរុស្ស៊ីនៅទីនោះ។ ក្រសួងបាននិយាយថា នាវារុស្ស៊ីបានចូលទៅជិតនាវាចម្បាំងសហរដ្ឋអាមេរិក បន្ទាប់ពីនាវាចម្បាំងនេះមិនអើពើទៅនឹងការព្រមានម្តងហើយម្តងទៀត ដើម្បីឲ្យចាកចេញពីតំបន់នៅក្នុងឈូងសមុទ្រ Peter the Great Gulf។ ក្រសួងការពារជាតិរុស្សីបាននិយាយថា បន្ទាប់ពីការប៉ុនប៉ងឆ្លងកាត់ព្រំដែនសមុទ្ររុស្ស៊ី នាវាចម្បាំងសហរដ្ឋអាមេរិកបានផ្លាស់ប្ដូរទិសដៅ នៅពេលដែលនាវាទាំងពីរ មានចម្ងាយត្រឹមតែ ៦០ម៉ែត្រពីគ្នាហើយបានបន្ថែមល្បឿន។ ក្រសួងបានចោទប្រកាន់ថា ការបើកបរនាវាពិឃាតសហរដ្ឋអាមេរិកបង្ហាញការបំពានធ្ងន់ធ្ងរ លើច្បាប់អន្តរជាតិស្តីពីការបញ្ចៀសការប៉ះទង្គិចគ្នារវាងនាវា និងកិច្ចព្រមព្រៀងឆ្នាំ១៩៧២ រវាងទីក្រុងម៉ូស្គូ និងទីក្រុងវ៉ាស៊ីនតោនលើការការពារឧបទ្ទវហេតុដែនអាកាស និងជើងទឹក៕
អត្ថបទ៖ ប៊ុនថន