ចិន៖ យានអវកាស Shenzhou-13 របស់ប្រទេសចិនដែលផ្ទុកអវកាសយានិកចិនចំនួន ៣នាក់បានចូលចតនៅស្ថានីយអវកាសរបស់ខ្លួននៅថ្ងៃសៅរ៍នេះ ដោយបានចាប់ផ្ដើមការស្នាក់នៅរយៈពេល ៦ខែដែលជាកំណត់ត្រាមួយ ខណៈប្រទេសនេះឆ្ពោះទៅរកការបញ្ចប់ការសាងសង់ស្ថានីយអវកាសថ្មី។
យានអវកាសថ្មីឈ្មោះថា Shenzhou-13 ត្រូវបានដឹកនាំដោយគ្រាប់រ៉ុកកែត Long March-2F ចេញពីមូលដ្ឋានបាញ់បង្ហោះ Jiuquan ស្ថិតក្នុងតំបន់វាលខ្សាច់ Gobi នៃខេត្ត Gansu ភាគពាយ័ព្យប្រទេសចិនកាលពីវេលាម៉ោង ១២:២៣នាទីយប់ម៉ោងនៅក្នុងទីក្រុងប៉េកាំង។ បុរសពីរនាក់ និងស្ត្រីម្នាក់គឺជាក្រុមនាវិកទី២ ដែលបានធ្វើដំណើរទៅស្ថានីយអវកាស ដែលលើកទី១ ត្រូវបានបាញ់បង្ហោះកាលពីខែមេសា។ ក្រុមអវកាសយានិកទី១ បានស្នាក់នៅស្ថានីយអាវកាសរយៈពេលត្រឹមតែ ៣ខែ។ អវកាសយានិកថ្មីនេះរួមមានទាំងអតីតទាហាន ២រូបនៃការធ្វើដំណើរអវកាសគឺលោក Zhai Zhigang អាយុ ៥៥ឆ្នាំ, នាង Wang Yaping អាយុ ៤១ឆ្នាំ និងសមាជិកអវកាសយានិកទី៣ លោក Ye Guangfu អាយុ ៤១ឆ្នាំកំពុងធ្វើដំណើរលើកដំបូងរបស់គេទៅកាន់ទីអវកាស។ ក្រុមអវកាសយានិកត្រូវបានជូនដំណើរដោយក្រុមតន្ត្រីយោធា និងអ្នកគាំទ្រច្រៀងចម្រៀងបទ "Ode to the Motherland" ដោយគូសបញ្ជាក់ពីទម្ងន់នៃមោទនភាពជាតិ ដែលបានវិនិយោគក្នុងកម្មវិធីអវកាសរបស់ប្រទេសចិនក្នុងរយៈពេលប៉ុន្មានឆ្នាំថ្មីៗនេះ៕
អត្ថបទ៖ ប៊ុនថន