ប្រធានាធិបតី​កោះ​តៃវ៉ាន់​សន្យា​ផ្តល់​ជំនួយបន្ទាប់ពី​អគ្គិភ័យ​

ប្រធានាធិបតីកោះតៃវ៉ាន់សន្យាផ្តល់ជំនួយបន្ទាប់ពីអគ្គិភ័យ

កោះតៃវ៉ាន់៖ ប្រធានាធិបតីកោះតៃវ៉ាន់លោកស្រី Tsai Ing-wen កាលពីថ្ងៃសុក្របានសន្យាផ្តល់ជំនួយដល់សមាជិកគ្រួសារជនរងគ្រោះ ដោយអគ្គិភ័យដែលបានឆក់យកជីវិតមនុស្ស ៤៦នាក់នៅទីក្រុង Kaohsiung ភាគខាងត្បូង។ អគ្គិភ័យបានលេបត្របាក់អគារកម្ពស់ ១៣ជាន់កាលពីព្រឹកថ្ងៃព្រហស្បតិ៍។

លោកស្រី Tsai បាននិយាយថា មិនថាតម្រូវការសម្រាប់អ្នករងរបួស ឬអ្នកស្លាប់នោះទេ លោកស្រីបានស្នើសុំទៅរដ្ឋបាលលោកស្រីរួចហើយដើម្បីផ្តល់ជំនួយទាំងអស់ដែលអាចធ្វើទៅបាន និងដើម្បីរកឱ្យឃើញពីមូលហេតុនៃអគ្គិភ័យនេះ។ មជ្ឈមណ្ឌលសេវាកម្មបណ្ដោះអាសន្នមួយត្រូវបានបង្កើតឡើងនៅជិតអគារឆាបឆេះ ដើម្បីជួយសមាជិកគ្រួសារដែលរងផលប៉ះពាល់ដែលនឹងអាចដាក់ពាក្យសុំប្រាក់ឧបត្ថម្ភ និងសំណងផ្សេងៗ។ ជាមួយគ្នានេះ មន្ត្រីកោះតៃវ៉ាន់បានបង្កើតគណៈកម្មការឯករាជ្យមួយ ដើម្បីស៊ើបអង្កេតពីស្ថានភាពនៅអគារដែលត្រូវបានបំផ្លាញនៅទីក្រុងកំពង់ផែ Kaohsiung ជាកន្លែងដែលអគ្គិភ័យបានសម្លាប់មនុស្ស ៤៦នាក់ និងរងរបួស ៤១នាក់ផ្សេងទៀត ខណៈអាជ្ញាធរបានពិនិត្យអគារដើម្បីរកមូលហេតុនៃការឆាបឆេះនេះ។

នៅទីក្រុងតៃប៉ិ ក្រុមសមាជិកសភាបាននៅស្ងៀមស្ងាត់មួយនាទីដើម្បីគោរពវិញ្ញាណក្ខន្ធជនរងគ្រោះ។ ប្រព័ន្ធផ្សព្វផ្សាយក្នុងស្រុកនិយាយថា នគរបាលកំពុងសួរចម្លើយស្ត្រីម្នាក់រស់នៅក្នុងអគារ ដែលបានចោទថាបានបោះចោលធូបដែលឆេះក្នុងធុងសំរាមមួយនៅក្នុងអគារ Apartment ដែលនាងបានទុកកំប៉ុងហ្គាសតូចៗ៕

អត្ថបទ៖ ប៊ុនថន