ប្រភពជាច្រើនបានប្រាប់សារព័ត៌មាន CNN ថា ទីភ្នាក់ងារសហព័ន្ធ ដែលមានភារកិច្ចការពារប្រព័ន្ធបោះឆ្នោតអាមេរិក បានដកខ្លួនចេញពីការងារសំខាន់ៗមួយចំនួន ដែលខ្លួនធ្លាប់បានធ្វើដើម្បីប្រឆាំងនឹងព័ត៌មានមិនពិត និងពាក្យចចាមអារ៉ាមនៅក្នុងការបោះឆ្នោតកាលឆ្នាំ២០២០ រួមទាំងការច្រានចោល ឬមិនអើពើនឹងសំណើគោលនយោបាយផ្ទៃក្នុង និងខាងក្រៅជាច្រើន ក្នុងការទាមទារឱ្យទប់ទល់នឹងព័ត៌មានមិនពិតក្នុងការបោះឆ្នោតឆ្នាំ២០២៤ នេះ។

ទីភ្នាក់ងារសន្តិសុខតាមអ៊ីនធឺណិតរបស់ក្រសួងសន្តិសុខមាតុភូមិ ឬហៅថា CISA ទទួលបន្ទុកការពារហេដ្ឋារចនាសម្ព័ន្ធការបោះឆ្នោតពីការវាយប្រហារទាំងនៅទីតាំងផ្ទាល់ និងតាមអ៊ីនធឺណិត ដែលជាកិច្ចការដ៏សំខាន់ ចាប់តាំងពីភ្នាក់ងារចារកម្មរុស្ស៊ី បានធ្វើកិច្ចប្រឹងប្រែងទូលំទូលាយដើម្បីជះឥទ្ធិពលដល់ការបោះឆ្នោតឆ្នាំ២០១៦ មក។

ខណៈពេលដែលទីភ្នាក់ងារ CISA បានអំពាវនាវយ៉ាងសកម្មនូវកិច្ចខិតខំប្រឹងប្រែងប្រឆាំងការជ្រៀតជ្រែងពីបរទេសនៅឆ្នាំនេះ ក្រុមការងារមានសកម្មភាពតិចជាងមុនក្នុងការលុបបំបាត់ព័ត៌មានមិនពិតក្នុងស្រុកអំពីការបោះឆ្នោត នេះបើយោងតាមបទសម្ភាសន៍ជាមួយក្រុមមន្ត្រីរៀបចំការបោះឆ្នោត ការពិនិត្យឡើងវិញលើកំណត់ត្រាសាធារណៈ និងប្រភពនៅក្នុងរដ្ឋាភិបាលសហព័ន្ធ។

មន្ត្រីភ្នាក់ងារលែងបន្តការត្រួតពិនិត្យលើវេទិកាបណ្ដាញសង្គមដែលផ្សព្វផ្សាយនូវព័ត៌មានមិនពិតតាមអ៊ិនធឺណិត ដោយភាគច្រើនពីមន្ត្រីបោះឆ្នោតនៅបក្សទាំងពីរដូចដែលពួកគេបានធ្វើក្នុងឆ្នាំ២០២០ បន្ទាប់ពីពាក្យបណ្តឹងពីក្រុមមេធាវីរបស់បក្សសាធារណរដ្ឋ ដែលចោទប្រកាន់ទីភ្នាក់ងារនេះពីបទត្រួតពិនិត្យជ្រុលហួសហេតុ រារាំងការបញ្ចេញមតិដោយសេរី៕