អ្នកឈ្នះការបោះឆ្នោតប្រធានាធិបតីអាមេរិក នៅថ្ងៃអង្គារ (ទី៥ ខែវិច្ឆិកា) នឹងក្លាយជាអ្នកដឹកនាំប្រទេសដែលមានប្រជាជនជាង ៣៣០លាននាក់ ប៉ុន្តែអ្វីដែលសឹងមិនគួរឲ្យជឿនោះ គឺថា ការប្រកួតប្រជែងនេះបែរជានឹងត្រូវសម្រេចដោយអ្នកបោះឆ្នោតត្រឹមតែប៉ុន្មានម៉ឺននាក់ ដែលជាចំណែកដ៏តិចតូចនៃចំនួនប្រជាជនរបស់ប្រទេស នៅក្នុងរដ្ឋមួយចំនួនតូច ឬមួយក្ដាប់តូច។

ហើយបើយោងតាមការស្ទង់មតិជាសាធារណៈ បានបង្ហាញឲ្យឃើញថា ការប្រកួតប្រជែងដ៏ស្ថិតស្វាញ ពោលគឺស្ថិតនៅក្នុងការប្រទាញប្រទង់គ្នា នៅឆ្នាំនេះ គឺមានរដ្ឋចំនួន ៧ប៉ុណ្ណោះ ក្នុងចំណោមរដ្ឋទាំង ៥០ ដោយរដ្ឋផ្សេងទៀតទាំងអស់ បានបង្ហាញការគាំទ្រយ៉ាងច្បាស់លាស់ ចំពោះគណបក្សប្រជាធិបតេយ្យ ឬសាធារណរដ្ឋ។

ក្នុងចំណោមរដ្ឋប្រទាញប្រទង់ទាំង ៧នោះ រដ្ឋ Pennsylvania ដែលមានប្រជាជនច្រើនជាងគេ គឺជារដ្ឋលេចធ្លោជាងគេដែលអាចទៅរួចបំផុត ក្នុងការកំណត់ថា តើបេក្ខជនបក្សប្រជាធិបតេយ្យ លោកស្រី Kamala Harris ឬបេក្ខជនបក្សសាធារណរដ្ឋ លោក Donald Trump នឹងឈ្នះតំណែងប្រធានាធិបតីបន្ទាប់។

គួរបញ្ជាក់ថា មិនដូចការបោះឆ្នោត សម្រាប់បេក្ខជនរបស់សហព័ន្ធផ្សេងទៀត និងការិយាល័យទូទាំងរដ្ឋនោះទេ ការប្រកួតប្រជែងប្រធានាធិបតី គឺមិនមែនផ្អែកតែលើការបោះឆ្នោតរបស់ប្រជាពលរដ្ឋឡើយ។ ផ្ទុយទៅវិញ ក្រោមប្រព័ន្ធ ដែលគេស្គាល់ថា Electoral College (អង្គបោះឆ្នោត) បេក្ខជនដែលឈ្នះនៅក្នុងរដ្ឋនីមួយៗ ក៏ដូចជាទីក្រុង Washington DC ទទួលបានការបោះឆ្នោតជ្រើសរើសរបស់រដ្ឋនោះ ដែលភាគច្រើនផ្អែកលើចំនួនប្រជាជន។

បេក្ខជនត្រូវការឈ្នះសំឡេងភាគច្រើននៃសំឡេងគាំទ្ររបស់សមាជិកអង្គបោះឆ្នោត ៥៣៨ ឬ ២៧០ ដែលអាចជួយឲ្យឈ្នះតំណែងប្រជាធិបតីបាន សូម្បីតែនៅពេលដែលបេក្ខជនរូបនោះ ចាញ់ការបោះឆ្នោតជាតិទាំងមូលក៏ដោយ ដូចកាលលោក Trump បានឈ្នះកៅអីសេតវិមាន ក្នុងឆ្នាំ២០១៦។

នៅក្នុងករណីដែលសំឡេងសមាជិកអង្គបោះឆ្នោតស្មើគ្នា ២៦៩-២៦៩ សភាតំណាងរាស្រ្តអាមេរិកត្រូវជ្រើសរើសអ្នកឈ្នះ ដោយគណៈប្រតិភូនៃរដ្ឋនីមួយៗទទួលត្រឹមតែ ១សំឡេង ជាសេណារីយោដែលអ្នកវិភាគនិយាយថា ទំនងជាផ្ដល់ភាពមានប្រៀបដល់អតីតប្រធានាធិបតី លោក Trump។ រដ្ឋចំនួន ៧ ដែលនឹងមានលទ្ធផលមិនអាចទាយទុកមុនបាន នៅថ្ងៃអង្គារនេះ គឺរដ្ឋ Michigan, Pennsylvania, Wisconsin, Arizona, Georgia, Nevada, និង North Carolina៕