មន្ត្រី ២រូប បានសារព័ត៌មានប្រាប់ Reuters ថា ប្រទេសម៉ាឡេស៊ី បានផ្ញើលិខិតប្តឹងតវ៉ាទៅប្រទេសវៀតណាម ជុំវិញការចោទប្រកាន់របស់ខ្លួន ពាក់ព័ន្ធនឹងការពង្រីកតំបន់ថ្មប៉ប្រះរបស់ប្រទេសនេះ ក្នុងទឹកសមុទ្រចិនខាងត្បូងដែលប្រទេសទាំង២ អះអាងថា ជាកម្មសិទ្ធិរបស់ពួកគេដូចគ្នា ជាកើនឡើងដ៏កម្រនូវភាពតានតឹងទ្វេភាគី ដែលមិនពាក់ព័ន្ធនឹងប្រទេសចិន។

ចំណាត់ការនេះបានបង្ហាញឲ្យឃើញនូវការមិនពេញចិត្តមួយទៀត ក្នុងចំណោមវិវាទជាច្រើន នៅក្នុងផ្លូវទឹកយុទ្ធសាស្ត្រ ដែលភាគច្រើនត្រូវបានប្រទេសចិនអះអាងអធិបតេយ្យភាពលើ ដោយទីក្រុងប៉េកាំងមានពាក់ព័ន្ធក្នុងការប៉ះទង្គិចជាញឹកញាប់ជាមួយហ្វីលីពីន និងជម្លោះម្ដងម្កាលជាមួយវៀតណាម។

ទិដ្ឋភាពដែលមានការតវ៉ាគ្នាបំផុត គឺនៅជុំវិញប្រជុំកោះ Spratly ដែលប្រទេសចិន កោះតៃវ៉ាន់ ម៉ាឡេស៊ី វៀតណាម ប្រ៊ុយណេ និងហ្វីលីពីន សុទ្ធតែមាននូវការទាមទារ និងកម្រិតនៃការកាន់កាប់ផ្សេងៗគ្នា។

ដោយបដិសេធមិនបង្ហាញភាពច្បាស់លាស់ជាងនេះ ដ្បិតនេះជាបញ្ហារសើបនោះ មន្ត្រីទាំង២ បាននិយាយថា លិខិតរបស់ម៉ាឡេស៊ីត្រូវបានផ្ញើទៅកាន់ក្រសួងការបរទេសវៀតណាម តាំងពីដើមខែតុលាមកម៉្លេះ ប៉ុន្តែរហូតមកដល់ពេលនេះ មិនទាន់ទទួលបានការឆ្លើយតបនៅឡើយទេ។

ការតវ៉ានេះ គឺពាក់ព័ន្ធនឹងការចោទប្រកាន់ពីការពង្រីកតំបន់សិប្បនិម្មិតរបស់វៀតណាម នៅតំបន់ថ្មប៉ប្រះទឹក Barque Canada ជាកូនកោះនៅប្រជុំកោះ Spratly ដែលវៀតណាមបានសាងសង់ហេដ្ឋារចនាសម្ព័ន្ធជាច្រើន។ នេះបើយោងតាមរូបភាពពីផ្កាយរណបដែលបានវិភាគដោយមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ ជាវិទ្យាស្ថានស្រាវជ្រាវមានមូលដ្ឋាននៅទីក្រុងវ៉ាស៊ីនតោន ដែលត្រូវបានចេញផ្សាយខែមុន៕