បណ្ដារដ្ឋជាច្រើននៅទូទាំងសហរដ្ឋអាមេរិក បានត្រៀមលក្ខណៈ និងបង្កើនសន្តិសុខរួចរាល់ ជុំវិញក្ដីបារម្ភនៃភាពចលាចលដ៏វឹកវរក្នុងការបោះឆ្នោតប្រធានាធិបតីនៅថ្ងៃអង្គារ ០៥ វិច្ឆិកា នេះ។

របងសន្តិសុខត្រូវបានដំឡើងជុំវិញអគារនៅទីក្រុងឡាសវេហ្គាស (Las Vegas) ជាទីដែលរដ្ឋ ណេវ៉ាដា (Nevada) ទៅបោះឆ្នោត។ តម្រួតរដ្ឋ អារីហ្សូណា (Arizona) ដាក់នាយកដ្ឋានរបស់ខ្លួនឱ្យស្ថិតក្នុងការប្រុងប្រយ័ត្នខ្ពស់ដើម្បីការពារប្រឆាំងនឹងអំពើហិង្សាដែលអាចកើតមាន ដោយដាក់យានដ្រូន និងអ្នកលបបាញ់នៅប្រចាំការ។ អភិបាលរដ្ឋយ៉ាងហោចណាស់បី បានអំពាវនាវឱ្យកងទ័ពឆ្មាំជាតិជួយរក្សាសន្តិភាព។

ក្នុងពេលដែលអាមេរិក កំពុងបោះឆ្នោតយ៉ាងតានតឹងដើម្បីសម្រេចថាតើលោក Donald Trump មកពីបក្សសាធារណរដ្ឋ ឬក៏អនុប្រធានាធិបតីបក្សប្រជាធិបតេយ្យ លោកស្រី Kamala Harris ជាប្រធានាធិបតីនោះ ក្ដីបារម្ភពីអំពើហិង្សាផ្នែកនយោបាយបានជំរុញឱ្យក្រុមមន្ត្រីចាត់វិធានការជាច្រើនដើម្បីពង្រឹងសន្តិសុខក្នុងអំឡុងពេល និងក្រោយថ្ងៃបោះឆ្នោត។

សកម្មភាពសន្តិសុខដែលអាចមើលឃើញច្រើនបំផុតគឺនៅក្នុងបណ្ដារដ្ឋប្រទាញប្រទង់ ដែលនឹងសម្រេចលើការបោះឆ្នោតប្រធានាធិបតី ជាពិសេសនៅរដ្ឋ Nevada ជាទីដែលការតវ៉ាដោយអ្នកគាំទ្រលោកអតីតប្រធានាធិបតី Donald Trump បានផ្ទុះឡើងបន្ទាប់ពីការបោះឆ្នោតឆ្នាំ២០២០។

ក្រុមមន្ត្រីបោះឆ្នោតក្នុងតំបន់នៃរដ្ឋ អារីហ្សូណា បានប្រាប់សារព័ត៌មានរ៉យទ័រថា ដោយភ័យព្រួយពីលទ្ធភាពនៃការតវ៉ា ឬអំពើហិង្សាផ្សេងៗ សាលារៀន និងព្រះវិហារជាច្រើននៅរដ្ឋនេះ ដែលធ្លាប់បម្រើការជាមណ្ឌលបោះឆ្នោតកាលពីមុន នឹងមិនធ្វើជាការិយាល័យបោះឆ្នោតនៅឆ្នាំនេះទេ៕