បេក្ខជនប្រធានាធិបតីមកពីគណបក្សសាធារណរដ្ឋ លោក Donald Trump បានព្រមានកាលពីថ្ងៃចន្ទ (០៤ វិច្ឆិកា) ថា ប្រសិនបើលោកជាប់ឆ្នោត លោកនឹងដាក់ទណ្ឌកម្មលើប្រទេសម៉ិកស៊ិក ជាមួយនឹងពន្ធគយ លុះត្រាតែរដ្ឋាភិបាលម៉ិកស៊ិក ប្រឹងប្រែងចាត់វិធានដើម្បីបញ្ឈប់លំហូរនៃសារធាតុហ្វង់តានីល (fentanyl) សម្រាប់ផលិតគ្រឿងញៀន ចូលទៅក្នុងសហរដ្ឋអាមេរិក។

នៅក្នុងការប្រមូលផ្តុំយុទ្ធនាការមួយថ្ងៃមុនបោះឆ្នោតនៅទីក្រុង ភីតស្បើក (Pittsburgh) រដ្ឋ Pennsylvania លោក Trump បាននិយាយថា លោកនឹងចាត់វិធានការយ៉ាងឆាប់រហ័សដើម្បីបង្ក្រាបការជួញដូរគ្រឿងញៀនតាមបណ្តោយព្រំដែនភាគខាងត្បូងសហរដ្ឋអាមេរិក ជាមួយម៉ិកស៊ិក ហើយថា លោកនឹងប្រើប្រាស់ពន្ធគយដ៏ធំដើម្បីបង្រ្កាបបញ្ហានោះ។ លោកសង្កត់ធ្ងន់ថា “យើងត្រូវបញ្ឈប់ជាបន្ទាន់នូវគ្រឿងញៀនដែលហូរកាត់ព្រំដែនរបស់យើង”។

រដ្ឋអាជ្ញាអាមេរិកនិយាយថា ក្រុមឧក្រិដ្ឋជន ស៊ីណាឡូអា របស់ម៉ិកស៊ិក គឺជាអ្នកផ្គត់ផ្គង់គ្រឿងញៀនដ៏ធំបំផុតដល់អាមេរិក។ អាជ្ញាធរទីក្រុងវ៉ាស៊ីនតោន ធ្លាប់បានលើកឡើងពីមុនថា សារធាតុហ្វង់តានីល គឺជាមូលហេតុចម្បងនៃការស្លាប់ដ៏ច្រើនលើសលប់របស់ជនជាតិអាមេរិក ដែលមានអាយុចន្លោះពី ១៨ ទៅ ៤៥ឆ្នាំ៕