សង្រ្គាមរបស់អ៊ីស្រាអែល លើតំបន់ហ្កាហ្សា បានក្លាយជារឿងមិនពេញចិត្តខ្លាំងនៅសហរដ្ឋអាមេរិក ជាពិសេសក្នុងចំណោមជនជាតិអាមេរិកវ័យក្មេង។ ទោះបីជាយ៉ាងនេះក្ដី ទាំងថ្នាក់ដឹកនាំខាងបក្សប្រជាធិបតេយ្យ និងបក្សសាធារណរដ្ឋបានទទូចថា ពួកគេគាំទ្រយ៉ាងពេញទំហឹងដល់អ៊ីស្រាអែល ខណៈក៏បានផ្តល់ការអំពាវនាវមួយចំនួនឱ្យបញ្ចប់ជម្លោះ ដែលបានរីករាលដាលដល់ប្រទេសលីបង់ និងបង្កជាហិង្សាដល់តំបន់កាន់កាប់ វេសបែង។

សម្រាប់ប្រជាជនហ្កាហ្សា វេសបែង និងលីបង់ ដែលជាកន្លែងរងផលប៉ះពាល់ខ្លាំងបំផុតដោយគោលនយោបាយរបស់ប្រធានាធិបតីអាមេរិកបន្ទាប់ដែលប្រឈមការបោះឆ្នោតនៅថ្ងៃទី០៥ ខែវិច្ឆិកានេះ មានការខ្វែងគំនិតគ្នាដោយអ្នកខ្លះថាពេញចិត្តលោក Donald Trump ហើយខ្លះទៀតពេញចិត្តលោកស្រី Kamala Harris ប៉ុន្តែក្ដីសង្ឃឹមដូចគ្នាតែមួយគត់របស់ពួកគេនោះគឺថា អ្នកណាក៏ដោយដែលឈ្នះឆ្នោត ត្រូវតែបញ្ចប់ជម្លោះដ៏បង្ហូរឈាមនេះ។

នៅសហរដ្ឋអាមេរិក ជនជាតិអាមេរិកាំងអារ៉ាប់ និងមូស្លីមជាច្រើន ក៏ដូចជាអ្នកគាំទ្រប៉ាឡេស្ទីនផ្សេងទៀត ចាត់ទុកថារដ្ឋបាលលោកប្រធានាធិបតី Joe Biden និងអនុប្រធានាធិបតី Harris ដែលជាបេក្ខភាពបក្សប្រជាធិបតេយ្យសម្រាប់តំណែងប្រធានាធិបតី ជាអ្នកទទួលខុសត្រូវចំពោះការមិនប្រឹងប្រែងបន្ថែមទៀតដើម្បីបញ្ឈប់ការបង្ហូរឈាម។

មនុស្សជាច្រើននិយាយថា ពួកគេមិនអាចបោះឆ្នោតឱ្យលោកស្រីឡើយ ទោះបីជាបេក្ខជនមកពីបក្សសាធារណរដ្ឋ លោក Trump ក៏មានជំហរគាំទ្រអ៊ីស្រាអែលយ៉ាងរឹងមាំក៏ដោយ។ នោះបាននាំឱ្យមានការជជែកវែកញែកទៅលើថា តើអ្វីជាដំណើរដ៏ល្អបំផុតសម្រាប់អ្នកដែលចង់ឱ្យអ៊ីស្រាអែល បញ្ឈប់ការវាយប្រហារយោធារបស់ខ្លួនលើប៉ាឡេស្ទីន និងលីបង់៕