​

ប្រទេសគុយបា បានចាប់ផ្តើមត្រៀមទប់ទល់សម្រាប់ការមកដល់ដែលត្រូវបានព្យាករនៃវិសម្ពាធត្រូពិកដ៏ខ្លាំងក្លានៅសមុទ្រតំបន់ការ៉ាអ៊ីបភាគខាងត្បូង ខណៈបុគ្គលិកសង្គ្រោះបន្ទាន់ នៅតែឆ្លើយតបទៅនឹងការដាច់ចរន្តអគ្គិសនីនៅទូទាំងប្រទេស និងព្យុះសង្ឃរា កាលពី២សប្តាហ៍មុននេះ។

មជ្ឈមណ្ឌលព្យុះសង្ឃរាជាតិរបស់សហរដ្ឋអាមេរិក បាននិយាយថា វិសម្ពាធទំនងជានឹងក្លាយទៅជាព្យុះត្រូពិក ដែលត្រូវបានគេដាក់ឈ្មោះថា «Rafael» មុនពេលវាយបោកបក់ដល់ប្រទេសហ្សាម៉ាអ៊ីក ដែលក្រោយមកវាយបោកបក់ទៅដល់ប្រទេសគុយបា ជាព្យុះសង្ឃរាប្រភេទទី១ នៅយប់ថ្ងៃអង្គារ ទី៥ ខែវិច្ឆិកា។

កាលពីពេលថ្មីៗនេះ ប្រទេសគុយបា បានទទួលរងការដួលរលំនៃបណ្តាញអគ្គិសនីជាតិរបស់ខ្លួន បណ្តាលឱ្យមនុស្សប្រមាណ១០លាននាក់ គ្មានអគ្គិសនីប្រើប្រាស់រយៈពេលជាច្រើនថ្ងៃ។ អ្នកស្រុកជាច្រើននៅកោះនេះនៅតែប្រឈមមុខនឹងការដាច់ចរន្តអគ្គិសនីច្រើនម៉ោងជារៀងរាល់ថ្ងៃ ដោយសារតែកង្វះការផ្គត់ផ្គង់។

ព្យុះសង្ឃរា Oscar បានបោកបក់ដល់ដីគោកនៅប្រទេសគុយបា ស្របពេលដែលមានការដាច់ចរន្តអគ្គិសនី ដោយបានបំផ្លាញធនធានដ៏មានតម្លៃ នៅក្នុងប្រទេសមួយដែលកំពុងរងការខ្វះស្បៀងអាហារ ប្រេងឥន្ធនៈ និងថ្នាំពេទ្យ ធ្ងន់ធ្ងរ។

អាជ្ញាធរ និយាយថា ពួកគេបានជម្លៀសប្រជាជនគុយបា ជាង៦៦.០០០នាក់ ពីចុងភាគខាងកើតប្រទេសគុយបា ក្នុងខេត្ត Guantanamo មុនពេលភ្លៀងធ្លាក់ និងទឹកជំនន់ខ្លាំងដែលតាមតាមការព្យាករណ៍ នៅដើមសប្តាហ៍នេះ។