​បាល់ទាត់៖ ក្រុមបាល់ទាត់​កូរ៉េ​ទាំងពីរ Ulsan Hyundai និង Pohang Steelers សុទ្ធតែ​បាន​កក់​កៅអី​នៅ​វគ្គ​ពាក់កណ្តាល​ផ្តាច់ព្រ័ត្រ​នៃ​ការប្រកួត​បាល់ទាត់​ក្លិប​កំពូល​អាស៊ី AFC Champions League​។ ​​Ulsan Hyundai ដែលជា​អតីត​ជើងឯក​ពីរ​សម័យ និង​ជា​ក្រុម​ការពារ​តំណែង​​ជើងឯក​បាន​យកឈ្នះ​មិត្ត​រួម​លី​គ​កូរ៉េ Jeonbuk Hyundai Motors ទាំង​ប្រផិតប្រផើយ​នៅ​ម៉ោង​បន្ថែម ១៥​នាទី ២ដង​។

​​Ulsan ដែលមាន​ឯកសណ្ឋាន​ពណ៌​ស​បាន​នាំ​មុខមុន​នៅ​នាទី​ទី១៣ ដោយ Valeri Qazaishvili មុន​ពេល​ដែល Jeonbuk តាម​ស្មើ​វិញ​នៅ​នាទី​ទី៣៩ ដោយ Kim Bo-Kyung​។​ ​​តែ​មុន​ចប់​វគ្គ​ទី១ នាទី​ទី៤៥+១ ទៅហើយ Yun Il-Lok ក៏​ស៊ុត​នាំមុខ​ឱ្យ Ulsan សារជាថ្មី​។ ​​ចូល​វគ្គ​ទី២ ជាថ្មី​ម្តងទៀត Jeonbuk ក៏​តាម​ស្មើ​បាន​ទៀត​នៅ​នាទី​ទី៤៨ ដោយ Takahiro Kunimoto ខណៈលទ្ធផល ២-២ នេះ​រក្សា​ដល់​ចប់ ៩០នាទី​។ ​​នៅក្នុង​ម៉ោង​បន្ថែម ១៥នាទី​លើក​ទី១ ត្រឹម​នាទី​ទី១០១ Ulsan Hyundai ក៏​រកបាន​គ្រាប់​ជ័យជំនះ​ដោយ​ការ​ស៊ុត​ពី​ចំងាយ​យ៉ាង​អស្ចារ្យ​របស់ Lee Dong-Gyeong​។ ​​ជ័យជំនះ​នេះ​ធ្វើឱ្យ Ulsan Hyundai បន្តដំណើរ​ការពារ​ជើងឯក​របស់ខ្លួន​ដោយ​នឹងត្រូវ​ជួប​ជាមួយ​មិត្ត​រួម​លី​គ​កូរ៉េ​មួយទៀត​គឺ Pohang Steelers​។

​​Pohang Steelers ដែលជា​អតីត​ជើងឯក ACL នេះ ៣​លើក​បាន​បំបាក់​ក្រុម​ជប៉ុន Nagoya Grampus ៣-០ នៅ​ថ្ងៃអាទិត្យ​ម្សិលមិញ​ផង​ដែរ ដើម្បី​ឡើង​វគ្គ​ពាក់កណ្តាល​ផ្តាច់ព្រ័ត្រ​ជា​លើកដំបូង​ក្នុង​រយៈពេល ១២ឆ្នាំ​។ ​​បី​គ្រាប់​របស់ Pohang Steelers ត្រូវ​រង់ចាំ​ដល់​វគ្គ​ទី២ ពោលគឺ​គ្រាប់​ដំបូង​នៅ​នាទី​ទី៥៣ ដោយ Lim Sang-hyub គ្រាប់​ទី​ពីរ​នាទី​ទី៧០ ដោយ Lee Seung-Mo និង​គ្រាប់​ចុងក្រោយ​ដោយ Lim Sang-hyub ដដែល​នាទី​ទី៩0+៥​។ ​​Ulsan Hyundai និង Pohang Steelers នឹងត្រូវ​ជួបគ្នា​នៅ​ថ្ងៃ​ពុធ​នេះ​ ដើម្បី​កៅអី​នៅ​វគ្គ​ផ្តាច់ព្រ័ត្រ​ទល់នឹង​ក្រុម​មកពី​អាស៊ី​ខាងលិច​រវាង Al-Nassr និង Al Hilal មកពី​អារ៉ាប៊ីសាអ៊ូឌីត​ដូចគ្នា​ជួបគ្នា​នៅ​ថ្ងៃ​អង្គារ​ ទី១៩ ស្អែក​នេះ​៕

​អត្ថបទ​៖​នាង សុភា​វុ​ធ