កូរ៉េខាងជើង៖ យោធាកូរ៉េខាងត្បូង និងជប៉ុនបាននិយាយថា កូរ៉េខាងជើងបានបាញ់មីស៊ីលបាលីស្ទីក ១គ្រាប់ចូលក្នុងសមុទ្រនៅថ្ងៃអង្គារនេះក្នុងការបន្តការសាកល្បងអាវុធថ្មីៗរបស់ខ្លួន ប៉ុន្មានម៉ោងបន្ទាប់ពីសហរដ្ឋអាមេរិកបានបញ្ជាក់ជាថ្មីថា ខ្លួនបានផ្តល់ការបន្តការពិភាក្សាការទូតលើកម្មវិធីអាវុធនុយក្លេអ៊ែររបស់កូរ៉េខាងជើង។
ប្រធានក្រុមសេនាធិការចម្រុះកូរ៉េខាងត្បូងនៅថ្ងៃអង្គារនេះមិនបាននិយាយភ្លាមៗថា មីស៊ីលបាលីស្ទីកប្រភេទណា ឬវាហោះបានចម្ងាយប៉ុន្មាននោះទេ។ ឆ្មាំសមុទ្រជប៉ុនបានចេញសេចក្ដីណែនាំ ស្ដីពីសុវត្ថិភាពដែនសមុទ្រដល់នាវាទាំងឡាយ ប៉ុន្តែមិនដឹងភ្លាមៗថា អាវុធនោះបានហោះទៅដល់ណាទេ។ ការិយាល័យប្រធានាធិបតីកូរ៉េខាងត្បូង គ្រោងនឹងរៀបចំកិច្ចប្រជុំក្រុមប្រឹក្សាសន្តិសុខជាតិនៅថ្ងៃក្រោយ ដើម្បីពិភាក្សាអំពីការបាញ់សាកល្បងនេះ។ ក្រោយភាពស្ងប់ស្ងៀមអស់រយៈពេលជាច្រើនខែ នៅក្នុងខែកញ្ញាប្រទេសកូរ៉េខាងជើងបានបង្កើនការសាកល្បងអាវុធរបស់ខ្លួន ខណៈដែលការផ្តល់ជូនសន្តិភាពតាមលក្ខខណ្ឌដល់ទីក្រុងសេអ៊ូល ជាការដាក់សម្ពាធលើកូរ៉េខាងត្បូងដើម្បីព្យាយាមទទួលបានអ្វីដែលខ្លួនចង់បានពីសហរដ្ឋអាមេរិក។
ក្នុងរយៈពេលប៉ុន្មានថ្ងៃនេះប្រេសិតពិសេសរបស់ប្រធានាធិបតី Joe Biden ទទួលបន្ទុកកិច្ចការកូរ៉េខាងជើងលោក Sung Kim គ្រោងនឹងជួបពិភាក្សាជាមួយសម្ព័ន្ធមិត្តអាមេរិកនៅទីក្រុងសេអ៊ូល ជុំវិញការរំពឹងទុកនៃការចរចាឡើងវិញជាមួយកូរ៉េខាងជើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
