យោធាកូរ៉េខាងត្បូង នៅថ្ងៃសៅរ៍ (ទី៩ ខែវិច្ឆិកា) នេះ បាននិយាយថា កូរ៉េខាងជើងបានធ្វើការជ្រៀតជ្រែកប្រព័ន្ធ GPS កាលពីថ្ងៃទី៨ និងទី៩ ខែវិច្ឆិកានេះ ដោយបានប៉ះពាល់ដល់ប្រតិបត្តិការរបស់នាវា និងយន្តហោះឯកជន។

អគ្គសេនាធិការចម្រុះរបស់កូរ៉េខាងត្បូង (JCS) បានណែនាំដល់នាវា និងយន្តហោះដែលកំពុងប្រតិបត្តិការនៅតំបន់សមុទ្រខាងលិច ឲ្យមានការប្រុងប្រយ័ត្ន ចំពោះសញ្ញារំខាន GPS របស់កូរ៉េខាងជើង។ ហើយ JCS បានជំរុញឲ្យកូរ៉េខាងជើងបញ្ឈប់ជាបន្ទាន់នូវការបង្កហេតុចុងក្រោយនេះ ដោយបានព្រមានថា ប្រទេសនេះនឹងទទួលខុសត្រូវ ចំពោះសកម្មភាពរបស់ខ្លួន។

GPS តំណាងឲ្យប្រព័ន្ធកំណត់ទីតាំងសកល ដែលជាបណ្តាញផ្កាយរណប និងទទួល ដែលប្រើសម្រាប់ការរុករកទិស។

គួរបញ្ជាក់ថា ភាពតានតឹង រវាងប្រទេសកូរ៉េទាំង២ បានផ្ទុះឡើងជាថ្មី ចាប់តាំងពីកូរ៉េខាងជើង ចាប់ផ្តើមបង្ហោះបាឡុងផ្ទុកសំរាមទៅកាន់កូរ៉េខាងត្បូង កាលពីចុងខែឧសភា ដោយជំរុញឲ្យកូរ៉េខាងត្បូង ចាប់ផ្តើមការផ្សាយសំឡេងឃោសនា ដោយឧបករណ៍បំពងសំឡេងឡើងវិញ។

អ្នកជំនាញអាកាសចរណ៍ បាននិយាយថា យុទ្ធនាការបង្ហោះបាឡុងសំរាមរបស់កូរ៉េខាងជើង ការបាញ់មីស៊ីល និងការលេចចេញនូវប្រព័ន្ធ GPS «បញ្ឆោត» បានបង្កើនហានិភ័យ នៅក្នុងដែនអាកាសកូរ៉េខាងត្បូង ដោយធ្វើឲ្យស្មុគស្មាញដល់ប្រតិបត្តិការអាកាសចរណ៍ ខណៈដែលភាពតានតឹងកើនឡើង រវាងប្រទេសគូអរិទាំង២៕