ក្រសួងការបរទេសរបស់ប្រទេសកាតា បាននិយាយកាលពីថ្ងៃសៅរ៍ (០៩ វិច្ឆិកា) ថា ទីក្រុងដូហា បានប្រាប់ក្រុមសកម្មប្រយុទ្ធប៉ាឡេស្ទីន ហាម៉ាស និងអ៊ីស្រាអែលថា ខ្លួននឹងបញ្ឈប់កិច្ចខិតខំប្រឹងប្រែងរបស់ខ្លួនក្នុងតួនាទីជាអ្នកសម្របសម្រួលបទឈប់បាញ់នៅតំបន់ហ្កាហ្សា និងកិច្ចព្រមព្រៀងដោះលែងចំណាប់ថ្នូរ រហូតដល់ភាគីជម្លោះទាំងពីរបង្ហាញពី "ឆន្ទៈ និង ភាពម៉ឺងម៉ាត់" ដើម្បីបន្តកិច្ចចរចាឡើងវិញ។

ប្រទេសឈូងសមុទ្រមួយនេះបានធ្វើការជាមួយសហរដ្ឋអាមេរិក និងអេហ្ស៊ីប អស់រយៈពេលជាច្រើនខែលើកិច្ចចរចាគ្មានផ្លែផ្ការវាងភាគីជម្លោះនៅតំបន់ហ្កាហ្សា ហើយការផ្តាច់ចេញពីដំណើរការនោះអាចធ្វើឱ្យមានភាពស្មុគស្មាញបន្ថែមទៀតដល់កិច្ចខិតខំប្រឹងប្រែងដើម្បីឈានដល់កិច្ចព្រមព្រៀងមួយនេះ។

ក្រសួងកាតាក៏បាននិយាយផងដែរថា របាយការណ៍សារព័ត៌មានស្តីពីអនាគតនៃការិយាល័យនយោបាយរបស់ក្រុមហាម៉ាស នៅទីក្រុងដូហា គឺមានភាពមិនត្រឹមត្រូវ ប៉ុន្តែមិនបានបញ្ជាក់អ្វីទៀតឡើយ។ ទីភ្នាក់ងារព័ត៌មានរ៉យទ័រ នៅថ្ងៃសុក្រ បានដកស្រង់សម្តីមន្ត្រីអាមេរិកម្នាក់ ដែលនិយាយថា ទីក្រុងវ៉ាស៊ីនតោន បានស្នើឱ្យកាតា បណ្តេញក្រុមនេះចេញ ហើយថាទីក្រុងដូហា បានបញ្ជូនសារនេះទៅកាន់ក្រុមហាម៉ាសរួចហើយ។

មន្ត្រីមួយរូបដែលដឹងពីបញ្ហានេះក៏បាននិយាយកាលពីថ្ងៃសៅរ៍ថា ប្រទេសកាតាបានសន្និដ្ឋានថា ជាមួយនឹងកិច្ចខិតខំប្រឹងប្រែងសម្របសម្រួលរបស់ខ្លួនត្រូវបានផ្អាក ការិយាល័យនយោបាយរបស់ក្រុមហាម៉ាសនៅទីនោះ "លែងបម្រើគោលបំណងរបស់ខ្លួនទៀតហើយ" ។ ប៉ុន្តែមន្ត្រីហាម៉ាស ៣នាក់បាននិយាយថា ក្រុមនេះមិនទទួលបានដំណឹងអ្វីពីកាតាឡើយ ដែលថាមេដឹកនាំរបស់ខ្លួនមិនត្រូវបានស្វាគមន៍ក្នុងប្រទេសនេះទៀត៕