មន្ត្រីអាមេរិកបានប្រាប់ទូរទស្សន៍ CNN កាលពីថ្ងៃអាទិត្យថា រុស្ស៊ីបានប្រមូលកម្លាំងដ៏ច្រើនរាប់ម៉ឺននាក់ រួមទាំងទាហានកូរ៉េខាងជើងដែលទើបនឹងមកដល់ផងដែរ ដើម្បីបើកការវាយលុកលើទីតាំងអ៊ុយក្រែននៅក្នុងតំបន់ឃើស(Kursk) របស់រុស្ស៊ីដែលរំពឹងទុកនៅប៉ុន្មានថ្ងៃខាងមុខនេះ ។

ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃព្រហស្បតិ៍ថា ទាហានកូរ៉េខាងជើងប្រហែល១១.០០០នាក់ស្ថិតនៅក្នុងតំបន់ជាទីដែលការលុកលុយយោធារយៈពេលបីខែរបស់អ៊ុយក្រែន ចូលទៅក្នុងទឹកដីរុស្ស៊ី បានជាប់គាំង។

សារព័ត៌មាន New York Times បានរាយការណ៍កាលពីថ្ងៃអាទិត្យថា ទាហានរុស្ស៊ី និងកូរ៉េខាងជើងប្រហែល ៥០.០០០នាក់ គ្រោងចូលរួមក្នុងការវាយលុកនេះ។

ទូរទស្សន៍ CNN បានទាក់ទងទៅរដ្ឋាភិបាលអ៊ុយក្រែនដើម្បីសុំការអត្ថាធិប្បាយជុំវិញរឿងនេះ។

មេបញ្ជាការអ៊ុយក្រែនបានប្រាប់ទូរទស្សន៍ CNN កាលពីថ្ងៃអាទិត្យថា ទាហានកូរ៉េខាងជើងបានចូលរួមក្នុងប្រតិបត្តិការប្រយុទ្ធដោយផ្ទាល់នៅក្នុងតំបន់ Kursk ក៏ដូចជាប្រតិបត្តិការការពារនៅក្នុងតំបន់ Belgorod នៅជិតខាងប្រទេសរុស្ស៊ី និងនៅក្នុងទឹកដីអ៊ុយក្រែនដែលកាន់កាប់ដោយរុស្ស៊ី។

លោកថាភាគច្រើន កម្លាំងទាំងនោះត្រូវបានកំណត់ថាជាមុខងារការពារជាតិទីពីរ។ នៅក្នុងតំបន់ Kursk ទាំងនេះគឺជាប្រតិបត្តិការប្រយុទ្ធដោយផ្ទាល់ ដោយលោកបានបន្ថែមថា ក្នុងចំណោមកងទ័ពទាំងនោះមានអង្គភាពជំនាញកាំភ្លើងធំ និងបាញ់ស៊ីបគោលដៅ។

មេបញ្ជាក់ដដែលបាននិយាយថាក្រុមទាំងនេះនឹងចូលរួមដោយផ្ទាល់នៅក្នុងប្រតិបត្តិការប្រយុទ្ធក្នុងរយៈពេលខ្លីនៅលើទឹកដីនៃប្រទេសអ៊ុយក្រែន។ ពួកគេទំនងជានឹងលេចមុខនៅក្នុងទឹកដីដែលកាន់កាប់របស់អ៊ុយក្រែនផងដែរ៕