ទីភ្នាក់ងារសារព័ត៌មានរដ្ឋ RIA របស់រុស្ស៊ី បានរាយការណ៍នៅថ្ងៃចន្ទ (១១ វិច្ឆិកា) នេះថា ក្រុមនាវារបស់កងទ័ពជើងទឹករុស្ស៊ី និងឥណ្ឌូនេស៊ី បានអនុវត្តសមយុទ្ធប្រឆាំងភេរវកម្មរួមគ្នា ផ្ដោតលើការរំដោះនាវាដែលចាប់ដោយពួកភេរវករ និងហ្វឹកហ្វឺនការប្រយុទ្ធជាមួយទូកដ្រូន ក្នុងអំឡុងពេលសមយុទ្ធកងទ័ពជើងទឹករួមគ្នាលើកដំបូងរវាងប្រទេសទាំងពីរនៅសមុទ្រជ្វា។

សមយុទ្ធរួម ដែលបានចាប់ផ្តើមកាលពីសប្តាហ៍មុននេះ បានកើតឡើង ខណៈដែលប្រធានាធិបតីថ្មីរបស់ឥណ្ឌូនេស៊ី លោក ប្រាបូវ៉ូ ស៊ូបៀនតូ (Prabowo Subianto) បានសន្យាបង្កើនទំនាក់ទំនងកាន់តែជិតស្និទ្ធជាមួយរុស្ស៊ីលើវិស័យការពារជាតិ ក្នុងកិច្ចប្រឹងប្រែងពង្រឹងមិត្តភាពជាមួយប្រទេសណាមួយជាផ្នែកនៃគោលនយោបាយការបរទេសមិនចូលបក្ខពួកដ៏យូរអង្វែងរបស់ទីក្រុងហ្សាការតា។

RIA បានរាយការណ៍ដោយដកស្រង់សេវាសារព័ត៌មាននៃកងនាវាចរប៉ាស៊ីហ្វិករុស្ស៊ីថា កងកម្លាំងនៃកងនាវារួម បានអនុវត្តការហាត់សម និងទំនាក់ទំនង ក៏ដូចជាការត្រួតពិនិត្យនាវាគួរឱ្យសង្ស័យ។ ការហ្វឹកហ្វឺននេះក៏ត្រូវបានធ្វើឡើងដើម្បីទប់ទល់នឹងទូកដ្រូន ជាមួយនឹងការបាញ់ចេញពីកាំភ្លើងធំស្វ័យប្រវត្តិ និងអាវុធតូចៗ។

ពីភាគីរុស្ស៊ី កងនាវាចរចំនួនបួនបានចូលរួមក្នុងសមយុទ្ធនេះ ហើយពីភាគីឥណ្ឌូនេស៊ី នាវាចម្បាំងធំៗចំនួនពីរគ្រឿងបានចូលរួម៕