លោកប្រធានាធិបតីអ៊ុយក្រែន Volodymyr Zelenskiy បាននិយាយកាលពីល្ងាចថ្ងៃអាទិត្យ (១០ វិច្ឆិកា) ថា កម្លាំង និងការទូតត្រូវតែមកព្រមគ្នាដើម្បីនាំសង្រ្គាមរុស្ស៊ី-អ៊ុយក្រែន ដល់ទីបញ្ចប់ និងដើម្បីធានាថាជម្លោះបែបនេះមិនកើតឡើងម្តងទៀតនាពេលអនាគត។

លោកបន្តថា បើពុំមានការយល់ដឹងច្បាស់លាស់ពីគោលដៅការទូតទេ អាវុធតែមួយមុខនឹងមិនអាចបំពេញសម្រេចសន្តិភាពបានឡើយ ហើយនោះហើយជាមូលហេតុដែលកម្លាំង និងការទូតត្រូវតែធ្វើការជាមួយគ្នា។

លោក Zelenskiy ដែលបានអំពាវនាវមិនឈប់ឈរសម្រាប់ការបញ្ចប់សង្រ្គាម "ដោយយុត្តិធម៌" បានបញ្ចុះបញ្ចូលសហរដ្ឋអាមេរិក និងសម្ព័ន្ធមិត្តណាតូរបស់ខ្លួនឱ្យបំពាក់អាវុធដល់ទីក្រុងគីវ និងជួយបង្ខំប្រធានាធិបតីរុស្ស៊ី លោក Vladimir Putin ឱ្យបង្កើតសន្តិភាព ដោយនិយាយថា អ៊ុយក្រែនបើកចំហសម្រាប់តែការទូត "ស្មោះត្រង់" ប៉ុណ្ណោះ។

អ៊ុយក្រែន ក៏បានអង្វរកដល់សម្ព័ន្ធមិត្តរបស់ខ្លួនជាពិសេសទីក្រុងវ៉ាស៊ីនតោន ឱ្យអនុញ្ញាតឱ្យទីក្រុងគីវ ប្រើប្រាស់អាវុធរយៈចម្ងាយឆ្ងាយរបស់លោកខាងលិចវាយប្រហារចូលជ្រៅទៅក្នុងទឹកដីរុស្ស៊ី ខណៈភាពមិនច្បាស់លាស់នៃមេដឹកនាំដឹកនាំថ្មីរបស់អាមេរិក គឺលោក Donald Trump បានធ្វើឱ្យអ៊ុយក្រែន កាន់តែខ្វល់ខ្វាយ៕