បុគ្គលិកនៅរដ្ឋ New York អាយុ ១៨ឆ្នាំម្នាក់ បានបាត់បង់ជីជិត អំឡុងពេលកំពុងប្រយុទ្ធនឹងចំហេះព្រៃ នៅក្នុងភូមិ Sterling Forest នៃតំបន់ Orange County ។

នគរបាលរដ្ឋ បានឲ្យដឹងនៅក្នុងសេចក្តីថ្លែងការណ៍ថា Dariel Vasquez ជាបុគ្គលិកជំនួយដែលធ្វើការឲ្យសួនឧទ្យាន ការកម្សាន្ដ និងការអភិរក្សប្រវត្តិសាស្ត្ររបស់រដ្ឋ New York កំពុងជួយកាត់បន្ថយអណ្ដាតភ្លើង ដែលកំពុងឆាបឆេះយ៉ាងសន្ធោសន្ធៅ នៅពេលដែលរូបគេបានស្លាប់នោះ។ នគរបាលកំពុងស៊ើបអង្កេតករណីនេះ។

នៅក្នុងសេចក្តីថ្លែងការណ៍មួយកាលពីថ្ងៃអាទិត្យ (ទី១០ ខែវិចិ្ឆកា) លោកអភិបាលរដ្ឋ Kathy Hochul បាននិយាយថា៖ «ខ្ញុំមានការសោកស្ដាយជាពន់ពេក ចំពោះការស្លាប់របស់បុគ្គលិកឧទ្យានរដ្ឋ New York របស់យើងម្នាក់ ខណៈដែលរូបគេកំពុងជួយឆ្លើយតបទៅនឹងចំហេះព្រៃនៅក្នុងតំបន់ Orange County កាលពីម្សិលមិញ។ ការអធិដ្ឋានរបស់ខ្ញុំទាំងអស់ សូមបញ្ជូនទៅកាន់ក្រុមគ្រួសារ មិត្តភក្តិ និងមិត្តរួមការងាររបស់គេ ក្នុងអំឡុងពេលវេលាដ៏សោកសៅនេះ»។

ចំហេះព្រៃ បានបន្តឆាបឆេះដដែល កាលពីល្ងាចថ្ងៃអាទិត្យ ចំពេលមានអាកាសធាតុក្តៅ និងស្ងួត នៅពាសពេញភាគឦសាន ដែលមនុស្ស ១១លាននាក់ បាន និងកំពុងស្ថិតក្រោមការព្រមាន អំពីអគ្គិភ័យ ដោយការព្រមានខ្លះចាប់ផ្តើមផុតកំណត់ កាលពីព្រឹកថ្ងៃអាទិត្យ ចំពេលដែលជិតដល់រដូវរងា ដែលរំពឹងថា នឹងនាំឲ្យមានភ្លៀងធ្លាក់តិចតួច។ 

គួរបញ្ជាក់ថា លោក Jeremy Oldroyd ដែលជាមន្ត្រីអនុរក្សព្រៃឈើរដ្ឋ បាននិយាយកាលពីរសៀលថ្ងៃអាទិត្យថា នៅក្នុងរដ្ឋ New York ចំហេះព្រៃចំនួន ៦០កន្លែង បានឆាបឆេះឡើង ចាប់តាំងពីថ្ងៃទី១ ខែតុលា ដោយបំផ្លិចបំផ្លាញផ្ទៃដីជាង ២.១០០ហិចតា៕