អង្គការសហប្រជាជាតិបានព្រមានថាខ្យល់ដែលសារជាតិបំពុលយ៉ាងខ្លាំងនៅក្នុងខេត្ត Punjab ដែលមានប្រជាជនច្រើនបំផុតរបស់ប្រទេសប៉ាគីស្ថាន កំពុងបង្កហានិភ័យធ្ងន់ធ្ងរដល់មនុស្ស រួមទាំងកុមារជាង ១១ លាននាក់ដែលមានអាយុក្រោម ៥ ឆ្នាំផងដែរ។   

មូលនិធិកុមាររបស់អង្គការសហប្រជាជាតិ ឬ UNICEF បានរាយការណ៍នៅក្នុងសេចក្តីថ្លែងការណ៍មួយកាលពីថ្ងៃចន្ទដើមសប្ដាហ៍នេះថា កម្រិតនៃការបំពុលខ្យល់បានបំបែកកំណត់ត្រានៅក្នុងទីក្រុង ឡាហ័រ (Lahore) និងស្រុកមួយចំនួនទៀតកាលពីសប្តាហ៍មុននេះ លើសពីគោលការណ៍ណែនាំគុណភាពខ្យល់របស់អង្គការសុខភាពពិភពលោកច្រើនជាង១០០ ដង ។ 

អង្គការនេះបាននិយាយថា មនុស្សរាប់រយនាក់ រួមទាំងកុមាររាប់សិបនាក់ ត្រូវបានបញ្ជូនទៅមន្ទីរពេទ្យនៅក្នុងទីក្រុងនានាដែលរងគ្រោះខ្លាំង ហើយការបំពុលគឺធ្ងន់ធ្ងរខ្លាំងណាស់។

លោក Abdullah Fadil តំណាងអង្គការ UNICEF ប្រចាំប្រទេសប៉ាគីស្ថាន បាននិយាយថា នៅពេលផ្សែងអ័ព្ទនៅតែបន្តកើតមាននៅក្នុងខេត្ត Punjab ខ្ញុំមានការព្រួយបារម្ភយ៉ាងខ្លាំងអំពីសុខុមាលភាពរបស់កុមារតូចៗដែលត្រូវបានបង្ខំឱ្យដកដង្ហើមស្រូបខ្យល់មានជាតិពុល។

លោកបានអំពាវនាវឱ្យមានកិច្ចខិតខំប្រឹងប្រែងជាបន្ទាន់ដើម្បីកាត់បន្ថយការបំពុលបរិយាកាស និងការពារសុខភាពកុមារ ដោយកត់សម្គាល់ថាសូម្បីតែមុនពេលកម្រិតនៃផ្សែងអ័ព្ទខ្លាំងបំផុតក៏ដោយ ប្រហែល ១២% នៃការស្លាប់របស់កុមារអាយុក្រោម ៥ ឆ្នាំនៅក្នុងប្រទេសប៉ាគីស្ថានត្រូវបានសន្មតថាដោយសារការបំពុលខ្យល់។

លោកបន្តថាផលប៉ះពាល់នៃផ្សែងអ័ព្ទដ៏ធ្ងន់ធ្ងរក្នុងឆ្នាំនេះនឹងត្រូវការពេលវេលាដើម្បីវាយតម្លៃ ប៉ុន្តែយើងដឹងថាការកើនឡើងទ្វេដង និងបីដងនៃបរិមាណការបំពុលបរិយាកាសនឹងមានផលប៉ះពាល់យ៉ាងធ្ងន់ធ្ងរ ជាពិសេសលើកុមារ និងស្ត្រីមានផ្ទៃពោះ៕