នាយករដ្ឋមន្ត្រីប្រទេសហៃទី លោក អាឡិច ឌីឌៀ ហ្វីអេមើ (Alix Didier Fils-Aime) បានចូលកាន់តំណែងកាលពីថ្ងៃចន្ទ (១១ វិច្ឆិកា) ខណៈមេដឹកនាំបណ្តោះអាសន្នថ្មីរបស់ប្រទេសនេះ បានសន្យាថានឹងធ្វើឱ្យប្រសើរឡើងនូវសន្តិសុខ ទោះបីជាក្រុមជនអន្ធពាលប្រដាប់អាវុធបានបង្ហាញសាច់ដុំរបស់ពួកគេដោយការវាយប្រហារដ៏គឃ្លើន លើយន្តហោះពាណិជ្ជកម្មដែលមានបំណងចុះចត ក្នុងរដ្ឋធានី របស់ប្រទេស ក៏ដោយ។

លោក ហ្វីអេមើ (Fils-Aime) ត្រូវបានតែងតាំងដោយក្រុមប្រឹក្សាអន្តរកាលរបស់ប្រទេសកោះតំបន់សមុទ្រការ៉ាអ៊ីបកាលពីចុងសប្តាហ៍ ដើម្បីបន្តតំណែងពីលោក Garry Conille ដែលបានកាន់តំណែងរយៈពេលត្រឹមតែ៦ខែប៉ុណ្ណោះ។

ក្រុមប្រឹក្សា និងនាយករដ្ឋមន្ត្រីថ្មី មានភារកិច្ចរៀបចំសម្រាប់ការបោះឆ្នោត ដែលបានពន្យារពេលជាយូរមកហើយ ក្នុងពេលមានវិបត្តិនយោបាយនិងសង្គមដ៏ជ្រៅ ដែលត្រូវបានបង្ហាញពីការកើនឡើងនៃភាពអត់ឃ្លាន និងអំពើហិង្សាដ៏បង្ហូរឈាម។

វីដេអូ បានបង្ហាញនគរបាលនៅតាមដងផ្លូវក្នុងទីក្រុងព័រអូប្រាំង(Port-au-Prince) ឆ្លើយតបទៅនឹងការវាយប្រហាររបស់សមាជិកក្រុមជនអន្ធពាល និងបានដើរល្បាត បន្ទាប់ពីជើងហោះហើររបស់ក្រុមហ៊ុនអាកាសចរណ៍ Spirit Airlines ទៅកាន់រដ្ឋធានី ត្រូវបានវាយប្រហារដោយកាំភ្លើង កាលពីថ្ងៃចន្ទ ដោយបានបណ្តាលឱ្យអ្នកបម្រើលើយន្តហោះម្នាក់រងរបួស និងបានបង្ខំឱ្យយន្តហោះ បង្វែរទិសដៅទៅសាធារណរដ្ឋដូមីនីក ដែលនៅជិតខាង។