ការវាយប្រហារដោយបើករថយន្តបំបុកហើយរត់គេចខ្លួន បង្កឡើងដោយបុរសអាយុ៦២ឆ្នាំម្នាក់ កាលពីល្ងាចថ្ងៃចន្ទ (១១ វិច្ឆិកា) នៅជិតមជ្ឈមណ្ឌលកីឡាមួយកន្លែងក្នុងទីក្រុង Zhuhai ភាគខាងត្បូងប្រទេសចិន បានបណ្តាលឲ្យមនុស្សច្រើននាក់រងរបួស ដេកដួលលើផ្លូវ។

វីដេអូមួយ ដែលបានបង្ហោះនៅលើបណ្តាញផ្សព្វផ្សាយសង្គមបន្ទាប់ពីការវាយប្រហារ បានបង្ហាញពីទិដ្ឋភាពនៅកន្លែងកើតហេតុដ៏ច្របូកច្របល់នៅលើផ្លូវខាងក្រៅមជ្ឈមណ្ឌលកីឡា ដោយមនុស្សជាច្រើនប្រមូលផ្តុំគ្នានៅជុំវិញអ្នករងរបួសដេកនៅលើផ្លូវ។

វីដេអូមួយផ្សេងទៀត បង្ហាញពីនគរបាល បានទៅដល់កន្លែងកើតហេតុនៃការបើករថយន្តបំបុកចូលហ្វូងមនុស្ស។

នៅក្នុងរបាយការណ៍មួយ នគរបាលបាននិយាយថា ពួកគេបាននាំខ្លួនបុរសម្នាក់ដែលមាននាមត្រកូល Fan ទៅកាន់មណ្ឌលឃុំឃាំង ដោយចោទប្រកាន់ថា បានបើករថយន្តបំបុកចូលអ្នកថ្មើរជើង នៅខាងក្រៅមជ្ឈមណ្ឌលកីឡា នៅម៉ោង ៧:៤៨នាទីយប់ ម៉ោងក្នុងស្រុក ដែលក្រោយមកបានរត់គេចខ្លួន។ នគរបាល នៅពុំទាន់បានផ្តល់មូលហេតុពីការបង្កគ្រោះថ្នាក់នេះនៅឡើយទេ។