ក្រុមបះបោរ បូកូ ហារ៉ាម (Boko Haram) បានសម្លាប់ទាហានឆាដ ១៧នាក់ នៅក្នុងការវាយប្រហារកាលពីចុងសប្តាហ៍ ទៅលើប៉ុស្តិ៍យោធាមួយ ដែលក៏បណ្តាលឱ្យអ្នកវាយប្រហារចំនួន ៩៦នាក់ បានស្លាប់ ដោយជនរងគ្រោះសរុបទាំងអស់ ១១៣នាក់ នៅភាគខាងលិចរបស់ប្រទេសឆាដ។

អ្នកនាំពាក្យកងទ័ព លោក អ៊ីសាក អាឆេក (Issakh Acheikh) បាននិយាយតាមទូរទស្សន៍ជាតិកាលពីយប់ថ្ងៃអាទិត្យ (១០ វិច្ឆិកា) ថា ការវាយប្រហារនៅតំបន់ លេក ឆាដ (Lake Chad) នេះបានកើតឡើងកាលពីថ្ងៃសៅរ៍ ប៉ុន្តែមិនបានផ្តល់ព័ត៌មានលម្អិតទេ។

តំបន់ Lake Chad នៅឆ្នាំនេះ ត្រូវបានញាំញីដោយការវាយប្រហារជាញឹកញាប់ពីក្រុមបះបោរ រួមទាំងក្រុម បូកូ ហារ៉ាម និងក្រុមរដ្ឋអ៊ិស្លាមនៅអាហ្វ្រិកខាងលិច។ នេះបានបង្កការភ័យខ្លាចនៃអំពើហិង្សាឡើងវិញ បន្ទាប់ពីរយៈពេលសន្តិភាពក្រោយប្រតិបត្តិការដ៏ជោគជ័យមួយ ដែលបានចាប់ផ្តើមនៅឆ្នាំ២០២០ របស់កងទ័ពឆាដ ដើម្បីបំផ្លាញមូលដ្ឋានរបស់ក្រុមជ្រុលនិយម។

ក្រុម បូកូ ហារ៉ាម ដែលបានចាប់ផ្តើមការបះបោរជាងមួយទសវត្សរ៍មុនប្រឆាំងនឹងការអប់រំលោកខាងលិច កំពុងស្វះស្វែងរកការបង្កើតច្បាប់អ៊ិស្លាមនៅភាគឦសានប្រទេសនីហ៊្សេរីយ៉ា។ ការបះបោរបានរាលដាលដល់ប្រទេសជិតខាងនៅអាហ្វ្រិកខាងលិច ដែលរួមមានកាមេរូន នីហ្សេ និងឆាដផងដែរ៕