អាជ្ញាធរប៉ាឡេស្ទីនកាលពីថ្ងៃចន្ទ បានថ្កោលទោសការអត្ថាធិប្បាយរបស់រដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich អំពីការដាក់អធិបតេយ្យភាពរបស់អ៊ីស្រាអែលលើតំបន់វេសបែង(West Bank)។

លោក Nabil Abu Rudeineh អ្នកនាំពាក្យរបស់ប្រធានអាជ្ញាធរប៉ាឡេស្ទីន បាននិយាយនៅក្នុងសេចក្តីប្រកាសព័ត៌មានមួយថា ការលើកឡើងរបស់លោក Smotrich បានបញ្ជាក់ថា រដ្ឋាភិបាលអ៊ីស្រាអែល មានបំណងបញ្ចប់ផែនការរបស់ខ្លួន ដើម្បីគ្រប់គ្រងតំបន់វេសបែង នៅឆ្នាំ ២០២៥ ហើយថា រដ្ឋាភិបាលនេះ មិនពេញចិត្តនឹង«ឧក្រិដ្ឋកម្ម» របស់ខ្លួន នៅក្នុងតំបន់ហ្កាហ្សា វេសបែង និងទីក្រុងហ្ស៊េរុយសាឡឹមទេ។

លោក Rudeineh បានបញ្ជាក់ថា ប្រធានអាជ្ញាធរប៉ាឡេស្ទីនបានឲ្យអាជ្ញាធរអ៊ីស្រាអែល ទទួលខុសត្រូវទាំងស្រុងចំពោះផលវិបាកនៃ«គោលនយោបាយដ៏គ្រោះថ្នាក់»ទាំងនេះ ដែលកំពុងរុញច្រានតំបន់នេះ ឆ្ពោះទៅរក«ការផ្ទុះជម្លោះទ្រង់ទ្រាយធំ»។

នៅក្នុងសេចក្តីថ្លែងការណ៍មួយ ក្រសួងការបរទេស និងជនបរទេសប៉ាឡេស្ទីន បានចាត់ទុកការអត្ថាធិប្បាយរបស់រដ្ឋមន្ត្រីហិរញ្ញវត្ថុអ៊ីស្រាអែលនេះថា ជាលទ្ធផលផ្ទាល់នៃការបរាជ័យរបស់អន្តរជាតិ។

ក្រសួងនេះ បានបន្តទៀតថា  ការបរាជ័យក្នុងការអនុវត្តសេចក្តីសម្រេចរបស់អង្គការសហប្រជាជាតិស្តីពីបញ្ហាប៉ាឡេស្ទីន និងអ្នកដែលអំពាវនាវឲ្យបញ្ចប់ការសម្លាប់រង្គាលនេះ លើកទឹកចិត្តឲ្យអ៊ីស្រាអែលបន្ត   «ឧក្រិដ្ឋកម្ម និងការរំលោភបំពាន»របស់ខ្លួនដែលមានគោលបំណង «លុបបំបាត់»បុព្វហេតុប៉ាឡេស្ទីន និងបំផ្លាញលទ្ធភាពនៃដំណោះស្រាយរដ្ឋពីរ។