ក្រុមប្រឹក្សាសន្តិសុខអង្គការសហប្រជាជាតិ កំពុងពិភាក្សាលើសេចក្តីសម្រេចដែលព្រាងដោយអង់គ្លេសដែលទាមទារឲ្យភាគីជម្លោះរបស់ស៊ូដង់បញ្ឈប់អរិភាព ហើយអំពាវនាវឲ្យពួកគេអនុញ្ញាតឲ្យផ្តល់ជំនួយប្រកបដោយសុវត្ថិភាព ឆាប់រហ័ស និងគ្មានការរារាំងឆ្លងកាត់ខ្សែបន្ទាត់ជួរមុខ និងព្រំដែន។ សង្រ្គាមនេះ បានផ្ទុះឡើង នៅក្នុងខែមេសា ឆ្នាំ ២០២៣ ចេញពីការតស៊ូអំណាចរវាងកងទ័ពស៊ូដង់ និងកងកម្លាំងយោធាប៉ារ៉ាគាំទ្ររហ័ស (RSF) មុនពេលការផ្លាស់ប្តូរដែលបានគ្រោងទុកទៅការគ្រប់គ្រងជនស៊ីវិល ហើយបានបង្កឲ្យមានវិបត្តិផ្លាស់ទីលំនៅដ៏ធំបំផុតរបស់ពិភពលោក។ សង្គ្រាមនេះ បានបង្កើតរលកនៃអំពើហិង្សាដែលជំរុញដោយជនជាតិភាគតិចដែលត្រូវបានស្តីបន្ទោសយ៉ាងច្រើនមកលើRSF។ RSF បានបដិសេធថា មិនបានធ្វើបាបជនស៊ីវិលក្នុងប្រទេសស៊ូដង់ទេ ហើយបានចាត់ទុកសកម្មភាពនេះថា ជាទង្វើរបស់ក្រុមអ្នកប្រព្រឹត្តអាក្រក់។ នៅក្នុងការដាក់ទណ្ឌកម្មដំបូងរបស់អង្គការសហប្រជាជាតិ ក្នុងអំឡុងពេលជម្លោះបច្ចុប្បន្ន គណៈកម្មាធិការក្រុមប្រឹក្សាសន្តិសុខ បានដាក់ទៅលើឧត្តមសេនីយ៍ RSF ពីររូប កាលពី  សប្តាហ៍មុន។

ឯកអគ្គរដ្ឋទូតចក្រភពអង់គ្លេសប្រចាំUN លោកស្រី Barbara Woodward បានថ្លែងប្រាប់អ្នកសារព័ត៌មាន នៅដើមខែ ខណៈដែលអង់គ្លេស បានចូលកាន់តំណែងជាប្រធានក្រុមប្រឹក្សាសន្តិសុខ នៅខែវិច្ឆិកានេះ ថា រយៈពេល ១៩ខែ នៅក្នុងសង្រ្គាមនេះ ភាគីទាំងពីរ បានប្រព្រឹត្តការរំលោភសិទ្ធិមនុស្សយ៉ាងធ្ងន់ធ្ងរ រួមទាំងការចាប់រំលោភស្ត្រី និងក្មេងស្រីផងដែរ។ 

លោកស្រី បាននិយាយថា៖«ជាងពាក់កណ្តាលនៃប្រជាជនស៊ូដង់ កំពុងជួបប្រទះនឹងអសន្តិសុខស្បៀងយ៉ាងធ្ងន់ធ្ងរ»។ «ទោះបីជាយ៉ាងណាក៏ដោយ កងកម្លាំងប្រដាប់អាវុធស៊ូដង់ (SAF) និង RSF នៅតែ   ផ្តោតលើការប្រយុទ្ធគ្នា គឺមិនមែនគ្រោះទុរ្ភិក្ស និងទុក្ខវេទនា ដែលប្រទេសរបស់ពួកគេ កំពុងប្រឈម   នោះទេ»។