សហរដ្ឋអាមេរិក បានសង្កត់ធ្ងន់នៅអង្គការសហប្រជាជាតិកាលពីថ្ងៃអង្គារ (១២ វិច្ឆិកា) ថា "ត្រូវតែគ្មានការជម្លៀសដោយបង្ខំ ឬគោលនយោបាយនៃភាពអត់ឃ្លាននៅក្នុងតំបន់ហ្កាហ្សា" ពីអ៊ីស្រាអែល ដោយព្រមានថាគោលនយោបាយបែបនេះនឹងមានផលប៉ះពាល់យ៉ាងធ្ងន់ធ្ងរនៅក្រោមច្បាប់សហរដ្ឋអាមេរិក និងច្បាប់អន្តរជាតិ។

ការលើកឡើងរបស់ឯកអគ្គរដ្ឋទូតសហរដ្ឋអាមេរិក ប្រចាំអង្គការសហប្រជាជាតិ លោកស្រី លីនដា ថូម៉ាស ហ្រ្គីនហ្វៀល (Linda Thomas-Greenfield) បានកើតឡើងតែប៉ុន្មានម៉ោងបន្ទាប់ពីទីក្រុងវ៉ាស៊ីនតោន បាននិយាយថា សម្ព័ន្ធមិត្តរបស់ខ្លួនគឺអ៊ីស្រាអែល កំពុងធ្វើគ្រប់គ្រាន់ហើយដើម្បីដោះស្រាយវិបត្តិមនុស្សធម៌ និងបញ្ចៀសការប្រឈមមុខនឹងការដាក់កម្រិតលើជំនួយយោធារបស់អាមេរិក។

លោកស្រី Thomas-Greenfield បានប្រាប់ក្រុមប្រឹក្សាសន្តិសុខអង្គការសហប្រជាជាតិថា "ទោះជាយ៉ាងណា អ៊ីស្រាអែលត្រូវតែធានាថាសកម្មភាពរបស់ខ្លួនត្រូវបានអនុវត្តយ៉ាងពេញលេញ ហើយការកែលម្អត្រូវតែមាននិរន្តរភាពតាមពេលវេលា"។ លោកស្រីបន្ថែមថា វាក៏មានសារៈសំខាន់ជាបន្ទាន់ផងដែរ ដែលអ៊ីស្រាអែលផ្អាកការអនុវត្តច្បាប់ហាមឃាត់ប្រតិបត្តិការរបស់ទីភ្នាក់ងារផ្តល់ជំនួយសង្គ្រោះប៉ាឡេស្ទីន UNRWA របស់អង្គការសហប្រជាជាតិ។

ក្រុមប្រឹក្សានេះបានជួបប្រជុំគ្នា ជុំវិញរបាយការណ៍របស់អ្នកជំនាញការស្រេកឃ្លានជាសាកល ដែលបាននិយាយថា មាន "លទ្ធភាពខ្ពស់ខ្លាំងដែលគ្រោះទុរ្ភិក្សនឹងកើតមាននៅក្នុងតំបន់នានា" នៃភាគខាងជើងហ្កាហ្សា នៅពេលដែលអ៊ីស្រាអែល បន្តការវាយលុកយោធាប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស នៅក្នុងតំបន់នោះ៕