នាយករដ្ឋមន្ត្រីប្រទេសអ៊ីស្រាអែល លោក Benjamin Netanyahu បាននិយាយក្នុងសារផ្ទាល់ទៅកាន់ប្រជាជនអ៊ីរ៉ង់ កាលពីថ្ងៃអង្គារថា រដ្ឋាភិបាលរបស់មេដឹកនាំកំពូល លោក Ayatollah Ali Khamenei ខ្លាចប្រជាជនអ៊ីរ៉ង់ ច្រើនជាងអ៊ីស្រាអែល។

លោក Netanyahu បាននិយាយថា «កុំបាត់បង់ក្តីសង្ឃឹម ហើយត្រូវដឹងថាអ៊ីស្រាអែល និងអ្នកដទៃទៀត ក្នុងពិភពលោកសេរីនេះ ឈរនៅជាមួយអ្នក។ នៅក្នុងសាររបស់លោក លោកបាននិយាយសំដៅទៅលើការវាយប្រហារដោយមីស៊ីលបាលីស្ទីករបស់អ៊ីរ៉ង់ កាលពីថ្ងៃទី១ ខែតុលា ទៅលើអ៊ីស្រាអែល ដោយនិយាយថា វាត្រូវចំណាយប្រាក់អស់ប្រហែល២,៣ពាន់លានដុល្លារនៃប្រាក់ដ៏មានតម្លៃរបស់អ្នក ប៉ុន្តែ បានបង្កការខូចខាតតិចតួចប៉ុណ្ណោះ នៅក្នុងប្រទេសអ៊ីស្រាអែល។

លោក Netanyahu បានធ្វើការអំពាវនាវកាលពីពេលមុន ដែលនិយាយទៅកាន់ប្រជាជនអ៊ីរ៉ង់ដោយផ្ទាល់ ព្រមទាំងទៅកាន់ជនស៊ីវិលនៅតំបន់ហ្កាហ្សា និងប្រទេសលីបង់។ លោក បាននិយាយថា ជីវិតនៅក្នុងប្រទេសអ៊ីរ៉ង់ អាចមានភាពខុសប្លែក ប្រសិនបើប្រទេសនេះមានសេរីភាព ហើយប្រាក់ក្នុងមូលនិធិនោះ អាចត្រូវបានប្រើប្រាស់សម្រាប់ការសិក្សាអប់រំ ផ្លូវថ្នល់ ទឹក និងមន្ទីរពេទ្យ ជំនួសឱ្យសង្រ្គាម។

លោកនិយាយថា ប៉ុន្តែនោះជាអ្វីដែលរបបរបស់លោក Khamenei បដិសេធអ្នកទាំងអស់គ្នា ជារៀងរាល់ថ្ងៃ។ ពួកគេឈ្លក់វង្វេងនឹងការបំផ្លាញអ៊ីស្រាអែល ជាជាងការកសាងប្រទេសអ៊ីរ៉ង់។ ខ្ញុំដឹងថាអ្នកមិនចង់បានសង្រ្គាមនេះទេ ខ្ញុំក៏មិនចង់បានសង្រ្គាមដែរ ហើយប្រជាជនអ៊ីស្រាអែល ពិតជាមិនចង់បានសង្រ្គាមឡើយ។