កូរ៉េខាងជើង៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃពុធនេះថា កូរ៉េខាងជើងបានបាញ់សាកល្បងមីស៊ីលបាលីស្ទីកថ្មី ១គ្រាប់ទៀតចេញពីនាវាមុជទឹក រយៈពេលមួយថ្ងៃបន្ទាប់ពីក្រុមអាជ្ញាធរនៅកូរ៉េខាងត្បូង និងជប៉ុនបានតាមដានថា មានការបាញ់សាកល្បងអាវុធពីប្រទេសឯកាមួយនេះកាលពីព្រឹកថ្ងៃអង្គារ។
យោធាកូរ៉េខាងត្បូងបានរាយការណ៍កាលពីថ្ងៃអង្គារថា ខ្លួនជឿជាក់ថា កូរ៉េខាងជើងបានបាញ់មីស៊ីលបាលីស្ទីកបាញ់ចេញពីនាវាមុជទឹក (SLBM) ក្បែរឆ្នេរសមុទ្រខាងកើតរបស់ខ្លួន ដែលជាការសាកល្បងមីស៊ីលជាបន្តបន្ទាប់ចុងក្រោយបំផុតរបស់កូរ៉េខាងជើង។ ទីភ្នាក់ងារសារព័ត៌មានរដ្ឋកូរ៉េខាងជើង KCNA បាននិយាយថា មីស៊ីលបាលីស្ទីកបាញ់ចេញពីនាវាមុជទឹកប្រភេទថ្មីនេះ ត្រូវបានបាញ់ចេញពីនាវាមុជទឹកតែមួយដែលបានប្រើក្នុងការសាកល្បងមីស៊ីលបាលីស្ទីក បាញ់ចេញពីនាវាមុជទឹកចាស់កាលពីឆ្នាំ២០១៦។ ក្រុមអ្នកវិភាគបានកត់សម្គាល់ថា រូបថតដែលចេញផ្សាយដោយសារព័ត៌មាន KCNA ទំនងជាបង្ហាញពីមីស៊ីលតូចជាងមីស៊ីលបាលីស្ទីក បាញ់ចេញពីនាវាមុជទឹកកាលពីកន្លងទៅរបស់កូរ៉េខាងជើង ហើយអាចជាគំរូដែលមិនធ្លាប់បានឃើញពីមុនមក ដែលបានដាក់តាំងបង្ហាញជាលើកដំបូងនៅឯពិព័រណ៍ការពារជាតិ នៅទីក្រុងព្យុងយ៉ាងកាលពីសប្តាហ៍មុន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
