ផ្សែងអ័ព្ទយ៉ាងក្រាស់ឃ្មឹកពីកង្វក់ខ្យល់ បានគ្របដណ្តប់រដ្ឋធានីជាតិរបស់ប្រទេសឥណ្ឌា នៅព្រឹកថ្ងៃពុធ (១៣ វិច្ឆិកា) នេះ ខណៈសីតុណ្ហភាពធ្លាក់ចុះ និងការបំពុលបរិយាកាសកើនឡើង ដោយកាត់បន្ថយការមើលឃើញនៅផ្នែកខ្លះ និងជំរុញឱ្យមានការព្រមានពីអាជ្ញាធរអាកាសយានដ្ឋានថាជើងហោះហើរអាចរងផលប៉ះពាល់។

ទីក្រុងញូវ ដេលី បានឡើងលើសទីក្រុង ឡាហ័រ (Lahore) របស់ប៉ាគីស្ថាន ក្លាយជាទីក្រុងដែលមានកង្វក់បរិយាកាសខ្លាំងបំផុតរបស់ពិភពលោក នៅក្នុងចំណាត់ថ្នាក់របស់ក្រុមសន្ទស្សន៍ខ្យល់ IQAir ប្រទេសស្វីស ជាមួយនឹងគុណភាពខ្យល់ឡើងច្រើនជាង១.០០០ ដែលត្រូវបានចាត់ទុកថាជា "កម្រិតគ្រោះថ្នាក់" ប៉ុន្តែអាជ្ញាធរផ្នែកបំពុលបរិយាកាសរបស់ឥណ្ឌា និយាយថា សន្ទស្សន៍គុណភាពខ្យល់របស់ខ្លួនមានប្រហែល៣៥០ ប៉ុណ្ណោះ។

ក្រសួងឧតុនិយមឥណ្ឌា (IMD) និយាយថា កង្វក់ខ្យល់បានកាត់បន្ថយការមើលឃើញមកត្រឹម ១០០ម៉ែត្រ នៅកន្លែងខ្លះនៅម៉ោងប្រហែល ៨ព្រឹក (ម៉ោងក្នុងស្រុក)។ ក្រសួង IMD បន្តថា សីតុណ្ហភាពក្នុងទីក្រុងបានធ្លាក់ចុះដល់ ១៧អង្សាសេ នៅព្រឹកថ្ងៃពុធ ពីតួលេខ ១៧,៩អង្សាសេ កាលពីថ្ងៃអង្គារ ហើយអាចនឹងធ្លាក់ចុះបន្ថែមទៀត ខណៈពន្លឺព្រះអាទិត្យត្រូវរារាំងដោយសារតែផ្សែងអ័ព្ទ។

ទីក្រុងដេលី ប្រយុទ្ធប្រឆាំងនឹងការបំពុលយ៉ាងធ្ងន់ធ្ងររៀងរាល់រដូវរងា នៅពេលដែលភាពត្រជាក់ និងខ្យល់ខ្លាំង បានហ៊ុមព័ន្ធធូលី ហើយការបំភាយឧស្ម័ន និងផ្សែងចេញពីចំហេះកសិដ្ឋានដែលដុតបំផ្លាញដំណាំដោយខុសច្បាប់នៅក្នុងរដ្ឋកសិកម្ម បានបង្កើនភាពធ្ងន់ធ្ងរនៃបញ្ហាបរិស្ថានបែបនេះ៕