ទីភ្នាក់ងារសុវត្ថិភាពផ្លូវហាយវេរបស់រដ្ឋាភិបាលអាមេរិក កំពុងស៊ើបអង្កេតលើបណ្ដឹងដែលថា ម៉ាស៊ីនរថយន្តហុងដា (Honda) និងអាគូរ៉ា (Acura) ដល់ទៅ ១,៤លានគ្រឿង អាចបរាជ័យ។

ការស៊ើបអង្កេតដោយរដ្ឋបាលសុវត្ថិភាពចរាចរណ៍ផ្លូវជាតិ NHTSA នេះ គ្របដណ្តប់លើស៊េរីឆ្នាំ២០១៦ ដល់ឆ្នាំ២០២០ នៃរថយន្ដ ហុងដា ផៃឡុត (Honda Pilot) និង អាគូរ៉ា អ៊ឹមឌីអ៊ិច (Acura MDX) ក៏ដូចជាម៉ូដែលឆ្នាំ២០១៨ ដល់ឆ្នាំ២០២០ នៃរថយន្តហុងដា អូឌីស៊ី (Honda Odyssey) និងអាគូរ៉ា ធីអ៊ិលអ៊ិច (Acura TLX) រួមទាំងម៉ាក ហុងដា រីចឡាញ (Honda Ridgeline) ពីឆ្នាំ២០១៧ ដល់២០១៩។

ទីភ្នាក់ងារនេះនិយាយនៅក្នុងឯកសារដែលបានបង្ហោះនៅលើគេហទំព័ររបស់ខ្លួនកាលពីថ្ងៃចន្ទ (១១ វិច្ឆិកា) ថា កំណាត់ភ្ជាប់បំពង់ដែកលើរថយន្តដែលមានម៉ាស៊ីន V6 ចំណុះ ៣,៥លីត្រអាចធ្លាក់ ដែលនាំឱ្យម៉ាស៊ីនបរាជ័យទាំងស្រុង។ បំពង់ដែកនោះគឺសំខាន់ណាស់សម្រាប់ភ្ជាប់ទុយោទៅនឹងប៊ីស្តុង និងបំប្លែងចលនាទេរ (vertical motion) ដើម្បីឱ្យកង់រថយន្តវិល។

គួររម្លឹកថា ក្រុមហ៊ុនហុងដា បានប្រមូលរថយន្តប្រហែល ២៥០.០០០គ្រឿងក្នុងខែវិច្ឆិកា ឆ្នាំ២០២៣ ដើម្បីដោះស្រាយបញ្ហាដូចគ្នានេះ។ ប៉ុន្តែទីភ្នាក់ងារសុវត្ថិភាពចរាចរណ៍អាមេរិក និយាយថា ខ្លួនមានពាក្យបណ្តឹងចំនួន១៧៣ករណី ពីម្ចាស់រថយន្ត ដែលបានរាយការណ៍ពីបរាជ័យបំពង់ដែកភ្ជាប់នោះ ប៉ុន្តែរថយន្តរបស់ពួកគេមិនត្រូវបានដាក់បញ្ចូលក្នុងការប្រមូលមកវិញនោះឡើយ។ ម្ចាស់រថយន្តម្នាក់បានរាយការណ៍ពីគ្រោះថ្នាក់ចរាចរណ៍ ប៉ុន្តែមិនមានអ្នករងរបួសទេ៕