អ្នកនាំពាក្យអង្គការសហប្រជាជាតិ បាននិយាយកាលពីថ្ងៃអង្គារថា ជើងហោះហើរទាំងអស់របស់អង្គការសហប្រជាជាតិ ទៅកាន់ប្រទេសហៃទី ត្រូវបានផ្អាក បន្ទាប់ពីយន្តហោះដឹកអ្នកដំណើរត្រូវបានវាយប្រហារដោយការបាញ់កាំភ្លើង ហើយអំពើហិង្សាកាន់តែខ្លាំងឡើង នៅក្នុងប្រទេសនេះ។

ជើងហោះហើរពាណិជ្ជកម្មរបស់ក្រុមហ៊ុនអាកាសចរណ៍ US Spirit Airlines ត្រូវបានបាញ់ដោយកាំភ្លើង នៅពេលយន្តហោះកំពុងទៅជិតដល់រដ្ឋធានីព័រអូប្រាំង ប្រទេសហៃទី កាលពីថ្ងៃចន្ទ ដែលបង្ខំឱ្យយន្តហោះត្រូវបង្វែរទិសដៅទៅសាធារណរដ្ឋដូមីនីក ដែលនៅជិតខាង។ 

នៅថ្ងៃដដែលនោះ ជើងហោះហើរ JetBlue Airways ត្រឡប់ពីទីក្រុងព័រអូប្រាំង ត្រូវបានឃើញមានការខូចខាតដោយគ្រាប់កាំភ្លើង បន្ទាប់ពីបានទៅដល់ទីក្រុងញូវយ៉ក។ 

លោក Stephane Dujarric អ្នកនាំពាក្យប្រមុខអង្គការសហប្រជាជាតិ បានប្រាប់អ្នកសារព័ត៌មានថា យោងតាមដៃគូរបស់អង្គការសហប្រជាជាតិបានឲ្យដឹងថា ក្រុមប្រដាប់អាវុធ បានធ្វើដំណើរនៅតាមដងផ្លូវក្នុងរដ្ឋធានី ដោយមានការប៉ះទង្គិចប្រដាប់អាវុធយ៉ាងហោចណាស់២០លើកត្រូវបានរាយការណ៍ ហើយការបិទផ្លូវជាច្រើនកន្លែងត្រូវបានដាក់ ដែលកំណត់ការធ្វើដំណើរនៅទូទាំងទីក្រុង។

លោកបាននិយាយបន្ថែមថា អាកាសយានដ្ឋានអន្តរជាតិ Toussaint Louverture ក្នុងទីក្រុងព័រអូប្រាំង ត្រូវបានបិទរហូតដល់ថ្ងៃទី១៨ ខែវិច្ឆិកា។ កំពង់ផែសមុទ្រនៅតែបើក ប៉ុន្តែផ្លូវគោកចូលទៅកាន់កំពង់ផែ បច្ចុប្បន្នមិនអាចធ្វើដំណើរបាន។

អ្នកនាំពាក្យអង្គការសហប្រជាជាតិ និយាយថា ដោយមានបញ្ហាទាំងនេះ ជើងហោះហើរទាំងអស់របស់អង្គការសហប្រជាជាតិ ត្រូវបានផ្អាក ដោយកំណត់លំហូរបុគ្គលិក និងធនធានមនុស្សធម៌ ហើយការដឹកជញ្ជូនស្បៀងអាហារនិងសម្ភារៈពេទ្យចំនួន២០រថយន្ត ទៅភាគខាងត្បូង ត្រូវបានផ្អាកផងដែរ។