​បាល់ទាត់៖ ​​ក្រុម​ជើងឯក​ឆ្នាំ២០១៩ ហង្ស​ក្រហម Liverpool បាន​យកឈ្នះ​នៅ​ទឹកដី​អេ​ស្ប៉ា​ញ Atletico Madrid ៣-២ ក្នុងជំនួប​ទី៣ ពូ​ល B ក្របខណ្ឌ UEFA Champions League​។ ​​នេះ​ជា​ជំនួប​លើកដំបូង​រវាង​ក្រុម​ទាំងពីរ​រាប់​ពី​ជួបគ្នា​ចុងក្រោយ​កាល់ពីដើមឆ្នាំ២០២០ នៅពេល​ផ្ទុះឡើង​ដំបូង​នៃ​មេរោគ​រាតត្បាត Covid-19 ហើយក៏​ជា​ប្រកួត​ចុងក្រោយ​នៅពេល​នោះដែរ​ដែល​អ្នកគាំទ្រ​បាន​ចូល​ទស្សនា​ពេញ​កីឡដ្ឋាន​។

​​ខ្សែប្រយុទ្ធ​អេ​ហ្ស៊ីប Mohamed Salah បើក​ការនាំ​មុខមុន​ឱ្យ Liverpool នៅ​នាទី​ទី៨ មុនពេល​ដែល Nabi Keita បន្ថែម​គ្រាប់​ទី​ពីរ​នៅ​នាទី​ទី១៣​។ ​​ក្រុម​របស់លោក Diego Simeone ក៏បាន​វាយបក​តាម​ពីក្រោយ ២គ្រាប់​វិញ​ដោយ​ខ្សែប្រយុទ្ធ​បារាំង Antoine Griezmann ពីរ​គ្រាប់​ម្នាក់ឯង​នៅ​នាទី​ទី២០ និង ៣៤​។ ​យ៉ាងណាក្តី​ក្រុម​ម្ចាស់ផ្ទះ​ក៏​សល់​គ្នា​ត្រឹម ១០នាក់​នៅពេល Griezmann បង្ក​កំហុស​លើ Roberto Firmino ទទួលបាន​កាត​ក្រហម​បណ្តេញ​ចេញពី​ការប្រកួត​នៅ​នាទី​ទី៥២ មុនពេល​ដែល Mario Hermoso បង្កកំហុស​លើ Diogo Jota ក្នុង​ប្រអប់​គ្រោះថ្នាក់​ ខណៈ Mohamed Salah ជា​ពេ​ជ្ឈឃាត ១១ម៉ែត្រ​ស៊ុត​ឱ្យ Liverpool យកឈ្នះ ៣-២ នៅ​ទឹកដី Atletico Madrid​។

​​ជ័យជំនះ​នេះ​មានន័យថា ​ក្រុម​របស់លោក Jurgen Klopp បន្ត​ឈ្នះ ១០០% ក្នុង​ពូ​ល B មាន ៩ពិន្ទុ​ពេញ​ខណៈ Atletico Madrid ឈរ​លេខ២ មាន ៤ពិន្ទុ​។ ​​មួយគូ​ទៀត​ក្នុង​ពូ​ល B នេះដែរ​ក្រុម​ម្ចាស់ផ្ទះ FC Porto យកឈ្នះ AC Milan ១-០ ដោយ​គ្រាប់​បាល់​ជ័យជំនះ​ដោយ Luis Diaz នៅ​នាទី​ទី៦៥ ធ្វើឱ្យ Porto ទទួលបាន ៣​ពិន្ទុ​ដ៏​មាន​សារសំខាន់​ឈរ​លេខ៣ មាន ៤ពិន្ទុ​ផងដែរ ខណៈ AC Milan នៅតែ​បន្ត​រក​ពិន្ទុ​មិនបាន​៕

​អត្ថបទ​៖​នាង សុភា​វុ​ធ