ប្រធានសភាលោក Nabih Berri ត្រូវបានដកស្រង់សម្តី ដែលបាននិយាយនៅថ្ងៃពុធ (ទី១៣ ខែវិច្ឆិកា) នេះថា ប្រទេសលីបង់កំពុងរង់ចាំសំណើបទឈប់បាញ់ជាក់ស្តែង បន្ទាប់ពីមន្ត្រីជាន់ខ្ពស់របស់សហរដ្ឋអាមេរិក បានលើកឡើងថា លោកបានឃើញ «ឱកាស» ពីការមានបទឈប់បាញ់ឆាប់ៗនេះ នៅក្នុងជម្លោះ រវាងអ៊ីស្រាអែល និងក្រុមហេសបូឡា។

រយៈពេល ២ថ្ងៃជាប់ៗគ្នា យោធាអ៊ីស្រាអែលបានវាយប្រហារតំបន់ជាយក្រុងភាគខាងត្បូងគ្រប់គ្រងដោយក្រុមហេសបូឡា នៅទីក្រុងបេរូត បន្ទាប់ពីបានវាយប្រហារតាមអាកាសលើតំបន់នោះ កាលពីថ្ងៃអង្គារ (ទី១២ ខែវិច្ឆិកា)។ គេបានឃើញផ្សែងហុយឡើងយ៉ាងទ្រលោមពីលើទីក្រុងបេរូត ក្រោយការវាយប្រហារនោះ។

ក្រសួងសុខាភិបាលលីបង់ បានប្រាប់ឲ្យដឹងថា ការវាយប្រហារតាមអាកាសរបស់អ៊ីស្រាអែល នាព្រឹកព្រលឹមថ្ងៃពុធនេះ ក៏បានសម្លាប់មនុស្ស ៦នាក់ផងដែរ នៅភូមិ Aaramoun ជាតំបន់ភ្នំដែលមានចម្ងាយប្រហែល ១៥គីឡូម៉ែត្រ នៅភាគខាងត្បូងនៃទីក្រុងបេរូត។

គួរបញ្ជាក់ថា អ៊ីស្រាអែលបានបើកការវាយលុកផ្លូវអាកាស និងផ្លូវគោកលើក្រុមហេសបូឡា ដែលគាំទ្រដោយអ៊ីរ៉ង់ កាលពីចុងខែកញ្ញា បន្ទាប់ពីមានជម្លោះឆ្លងព្រំដែនជិត ១ឆ្នាំ ដែលកើតឡើងស្របនឹងសង្រ្គាម នៅតំបន់ហ្កាហ្សា។

យ៉ាងណាក្ដី បេសកជនសេតវិមាន លោក Amos Hochstein បានប្រាប់សារព័ត៌មាន Axios ថា លោកគិតថា «មានឱកាស» ដែលអាចនាំឲ្យឈានដល់បទឈប់បាញ់ នៅក្នុងប្រទេសលីបង់ ក្នុងពេលឆាប់ៗនេះ។ លោកនិយាយថា៖ «ខ្ញុំសង្ឃឹមថា យើងអាចទទួលបានវា (បទឈប់បាញ់)»។

ការអត្ថាធិប្បាយរបស់លោក ចង្អុលបង្ហាញពីកិច្ចប្រែងប្រែងចុងក្រោយរបស់រដ្ឋបាលប្រធានាធិបតីអាមេរិក លោក Joe Biden ដើម្បីធ្វើយ៉ាងណាឲ្យទទួលបានបទឈប់បាញ់ នៅលីបង់ ខណៈដែលកិច្ចការការទូត ដើម្បីបញ្ចប់សង្រ្គាម នៅតំបន់ហ្កាហ្សា ទំនងជាលែងចេញជាផ្លែផ្កាហើយ ដោយអ្នកសម្របសម្រួលកាតាបានសម្រេចផ្អាកតួនាទីរបស់ខ្លួន៕