បេសកជនរបស់ប្រធានាធិបតីរុស្ស៊ីទទួលបន្ទុកស៊ីរីលោក Alexander Lavrentyev បានប្រាប់សារព័ត៌មាន TASS ថា ស្ថានការណ៍នៅមជ្ឈិមបូព៌ា កាន់តែអាក្រក់ឡើងៗ ជាមួយនឹងការប៉ុនប៉ងជាច្រើន ត្រូវបានធ្វើឡើង ដើម្បីអូសប្រទេសស៊ីរី ចូលទៅក្នុងជម្លោះទ្រង់ទ្រាយធំ នៅក្នុងតំបន់នេះ។

លោកបាននិយាយថា៖«គួរឲ្យសោកស្ដាយ យើងឃើញជម្លោះនៅមជ្ឈិមបូព៌ា កាន់តែរីកធំឡើង។ អ៊ីស្រា អែល និងអ៊ីរ៉ង់ បានវាយប្រហារគ្នាទៅវិញទៅមកជាបន្តបន្ទាប់ ហើយយើងក៏ឃើញមានការប៉ុនប៉ង អូសទាញស៊ីរី ចូលទៅក្នុងការប្រឈមមុខដាក់គ្នាដោយប្រដាប់អាវុធ»។

យោងតាមអ្នកការទូតរូបនេះបានឲ្យដឹង អាទិភាពចម្បងនាពេលបច្ចុប្បន្ននេះ គឺត្រូវទប់ស្កាត់ការប៉ុនប៉ងអូសទាញស៊ីរី ចូលទៅក្នុងជម្លោះមជ្ឈិមបូព៌ា។

ភាពតានតឹងបានផ្ទុះឡើងម្តងទៀតនៅមជ្ឈិមបូព៌ា កាលពីថ្ងៃទី ០៧ ខែតុលា ឆ្នាំ ២០២៣ បន្ទាប់ពីក្រុម សកម្មប្រយុទ្ធមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាន នៅតំបន់ហ្កាហ្សាស្ទ្រីប បានបើកការលុកលុយដ៏គួរឲ្យភ្ញាក់ផ្អើលមួយនៅលើទឹកដីអ៊ីស្រាអែល ដោយបានសម្លាប់ជនជាតិអ៊ីស្រាអែលជាច្រើននាក់ ដែលរស់នៅក្បែរព្រំដែនហ្កាហ្សា និងចាប់ពង្រត់ជនជាតិអ៊ីស្រាអែលជាង ២៤០នាក់ ក្នុងនោះមានស្ត្រី កុមារ និងមនុស្សចាស់។