រដ្ឋមន្ត្រីក្រសួងសុខាភិបាល លោក Roger Kamba បាននិយាយកាលពីល្ងាចថ្ងៃពុធថា សាធារណរដ្ឋប្រជាធិបតេយ្យកុងហ្គោ (DRC) ដែលជាចំណុចកណ្តាលនៃការរីករាលដាលជំងឺអុតស្វា(mpox) ដែលនៅតែបន្ត នឹងចាប់ផ្តើមការចាក់វ៉ាក់សាំងជុំថ្មីមួយទៀត។ សាធារណរដ្ឋប្រជាធិបតេយ្យកុងហ្គោ (DRC) ដែលបានកត់ត្រាអ្នកស្លាប់ជាង១.១០០នាក់ដោយសារជំងឺអុតស្វា(mpox) ចាប់តាំងពីដើមឆ្នាំ២០២៤ បានចាក់វ៉ាក់សាំងដល់មនុស្សប្រហែល ៥១.០០០នាក់។

លោករដ្ឋមន្ត្រី បាននិយាយនៅក្នុងសន្និសីទសារព័ត៌មានក្នុងទីក្រុង Kinshasa ថា បច្ចុប្បន្ន អ្នកទាំងនេះ ត្រូវចាក់វ៉ាក់សាំងដូសទីពីរ។ លោក Kamba និយាយថា ប្រទេសកុងហ្គោ មានវ៉ាក់សាំងចំនួន ២០០.០០០ដូសនៅក្នុងដៃ ហើយរំពឹងថានឹងទទួលបានវ៉ាក់សាំងចំនួន ១០០.០០០ដូសបន្ថែមទៀតនៅថ្ងៃព្រហស្បតិ៍នេះ។

ប្រទេសនេះ មានគោលបំណងចាក់វ៉ាក់សាំងដល់ប្រជាជនសរុបចំនួន២,៥ លាននាក់ ដោយប្រើប្រាស់វ៉ាក់សាំងចំនួន៣,៥លានដូស។

ចាប់តាំងពីដើមឆ្នាំនេះ ករណីសង្ស័យចំនួន៤២.៩១២ករណីត្រូវបានរាយការណ៍ រួមទាំងករណីដែលបានបញ្ជាក់មានចំនួន ៩.៤៥៦ករណី និង១.១៣២នាក់ បានស្លាប់។

ប្រទេសអាហ្រ្វិកកណ្តាលមួយនេះ កំពុងប្រឈមមុខទៅនឹងអត្រាស្លាប់ខ្ពស់ ដោយសារតែការពិនិត្យរោគវិនិច្ឆ័យយឺតយ៉ាវ និងដំណើរការទទួលបានការព្យាបាលមានកម្រិត នៅក្នុងតំបន់សុខភាពមួយចំនួន នេះបើយោងតាមអង្គការសុខភាពពិភពលោក។

ជំងឺអុតស្វា(Mpox) ត្រូវបានគេស្គាល់ផងដែរថា monkeypox ជាជំងឺឆ្លង។ វាឆ្លងរាលដាលតាមរយៈ ទំនាក់ទំនងជិតស្និទ្ធ មានរោគសញ្ញាដូចជាគ្រុនក្តៅ ឡើងកូនកណ្តុរ ឈឺបំពង់ក ឈឺសាច់ដុំ កន្ទួលលើស្បែក និងឈឺខ្នង។