​ហៃទី៖ កិច្ចខិតខំ​ប្រឹងប្រែង​ដ៏​អស់សង្ឃឹម​បាន​បន្ត​កាលពី​ថ្ងៃ​អង្គារ ​ដើម្បី​ជួយសង្គ្រោះ​ក្រុម​សាសនទូត ភាគច្រើន​ជា​ជនជាតិ​អាមេរិក ដែល​ត្រូវបាន​ចាប់ខ្លួន​ដោយ​ក្រុម​អន្ធពាល​ឧក្រិដ្ឋជន​នៅ​ប្រទេស​ហៃ​ទី​។ ភ្នាក់ងារ FBI កំពុងធ្វើការ​ជាមួយ​អាជ្ញាធរ​មូលដ្ឋាន​នៅក្នុង​ប្រទេស ក្នុង​តំបន់​កា​រ៉ា​អ៊ី​ប​ដ៏​តូច​មួយ​នេះដើម្បី​ស្វែងរក​ជនជាតិ​អាមេរិក​ចំនួន ១៦នាក់ និង​ជនជាតិ​កាណាដា​ម្នាក់ដែល​ត្រូវបាន​ចាប់ជំរិត​កាលពី​ថ្ងៃ​សៅរ៍​។

​ប្រភព​រដ្ឋាភិបាល​ជាន់ខ្ពស់​បានបញ្ជាក់​ប្រាប់​សារព័ត៌មាន CBS News ថា ​ក្រុម​ជន​អន្ធពាល​នេះ​បាន​ទារ​ប្រាក់​ចំនួន ១​លាន​ដុល្លារ​ក្នុង​ចំណាប់ខ្មាំង​ម្នាក់ៗ​សរុប​ចំនួន ១៧​លាន​ដុល្លារជា​ថ្នូរ​នឹង​ការ​ដោះ​លែង​ក្រុម​សាសនទូត ឬ​អ្នក​ផ្សព្វផ្សាយ​សាសនា​។ ចំនួន​ទឹកជា​ប្រាក់​ដុល្លារ​ត្រូវ​បាន​រាយការណ៍​ជា​លើកដំបូង​ដោយសារ​ព័ត៌មាន The Wall Street Journal។ ​ក្រុម​សាសនទូតមកពី​អង្គការ​គ្រឹ​ស្ត​ដែល​មាន​មូលដ្ឋាន​នៅ​រដ្ឋ Ohio ត្រូវ​បាន​គេ​ចាប់ជំរិត​នៅ​ខាង​ក្រៅ​រដ្ឋធានី​ Port-au-Prince​ ប្រទេស​ហៃ​ទី​។ លោក Manuel Bojorquez អ្នកឆ្លើយឆ្លង​ព័ត៌មាន​របស់​ទូរទស្សន៍ CBS News និង​ក្រុម​របស់​ការងារ​របស់​លោក​នៅ​ក្នុង​ទីក្រុង អាច​ទទួល​បាន​លេខ​ទូរស័ព្ទ​មួយ​ពី​មេក្រុម​អន្ធពាល​ដែល​មាន​ឈ្មោះថា "400 Mawozo" ដែល​ក្រុម​អាជ្ញាធរ​ជឿ​ជាក់​ថា​ នៅ​ពី​ក្រោយ​ការ​ចាប់​ជំរិត​នេះ​។

ទូរទស្សន៍ CBS News បាន​ទូរស័ព្ទ​ទៅកាន់​លេខ​នោះ ហើយ​មាន​បុរស​ម្នាក់​បាន​លើក​ទូរស័ព្ទ​និយាយ ប៉ុន្តែ​លោក​បាន​ដាក់​ទូរស័ព្ទ​ចុះ​វិញ បន្ទាប់ពី​ភាគី​ម្ខាង​ទៀត​លែង​និយាយ​។​ ​កាលពី​ថ្ងៃ​ចន្ទ ​ជនជាតិ​ហៃ​ទី​បាន​ធ្វើ​បាតុកម្ម​នៅ​តាម​ដង​ផ្លូវ​ក្នុង​ទីក្រុង Port-au-Prince ដើម្បី​តវ៉ា​ប្រឆាំង​នឹង​វិបត្តិ​ជាច្រើន​ដែល​កំពុង​ជួបប្រទះ រួម​ទាំង​ការ​កើន​ឡើង​នៃ​ការ​ចាប់​ជំរិត​ដោយ​ហិង្សា រញ្ជួយ​ដី​ដ៏​ធ្ងន់ធ្ងរ និង​ការ​ធ្វើ​ឃាត​ប្រធានាធិបតី​របស់​ពួកគេ​កាលពី​រដូវ​ក្តៅ​ជាដើម​៕

អត្ថបទ៖ សុខមាន