មន្ត្រីអាមេរិកពីររូប និងប្រភពដែលដឹងពីការសម្រេចចិត្តបាននិយាយកាលពីថ្ងៃអាទិត្យ ១៧ វិច្ឆិកាថា រដ្ឋបាលរបស់លោកប្រធានាធិបតី Joe Biden បានអនុញ្ញាតឱ្យអ៊ុយក្រែនប្រើប្រាស់អាវុធផលិតដោយសហរដ្ឋអាមេរិក វាយប្រហារចូលជ្រៅទៅក្នុងប្រទេសរុស្ស៊ី ជាការផ្ទុយទៅនឹងគោលនយោបាយរបស់ទីក្រុងវ៉ាស៊ីនតោនក្នុងជម្លោះអ៊ុយក្រែន-រុស្ស៊ី។

ប្រភពខាងលើបាននិយាយថា អ៊ុយក្រែនគ្រោងបើកការវាយប្រហារដោយអាវុធរយៈចម្ងាយឆ្ងាយលើកដំបូងរបស់ខ្លួនក្នុងរយៈពេលប៉ុន្មានថ្ងៃខាងមុខនេះ ដោយពុំបានបង្ហាញពីព័ត៌មានលម្អិតណាមួយឡើយដោយសារតែការព្រួយបារម្ភអំពីសុវត្ថិភាពប្រតិបត្តិការ។

 ចំណាត់ការនេះ កើតឡើងពីរខែមុនពេលប្រធានាធិបតីជាប់ឆ្នោតលោក Donald Trump ចូលកាន់តំណែងនៅថ្ងៃទី២០ ខែមករា និងធ្វើតាមការអង្វរជាច្រើនខែរបស់ប្រធានាធិបតីអ៊ុយក្រែនលោក Volodymyr Zelenskyy បើកភ្លើងខៀវឱ្យយោធាអ៊ុយក្រែនប្រើប្រាស់អាវុធរបស់អាមេរិកវាយប្រហារគោលដៅយោធានានារបស់រុស្ស៊ីនៅឆ្ងាយពីព្រំដែនរបស់ខ្លួន។

ប្រភពដដែលបាននិយាយថា ការប្រែប្រួលនេះកើតឡើងភាគច្រើនក្នុងការឆ្លើយតបទៅនឹងការដាក់ពង្រាយទ័ពថ្មើរជើងរបស់កូរ៉េខាងជើងពីសំណាក់រុស្ស៊ី ដើម្បីបំពេញបន្ថែមកងកម្លាំងរបស់ខ្លួន ជាការវិវឌ្ឍន៍មួយដែលបានបង្កឱ្យមានការភ្ញាក់ផ្អើលនៅក្នុងទីក្រុងវ៉ាស៊ីនតោន និងទីក្រុង Kyiv។

លោក Zelenskyy បាននិយាយ អ្នកសារព័ត៌មានជាច្រើនកំពុងនិយាយថាយើងបានទទួលការអនុញ្ញាតឲ្យចាត់វិធានការសមស្រប។ប៉ុន្តែការវាយប្រហារមិនត្រូវបានធ្វើឡើងដោយពាក្យសម្ដីទេ។ រឿងបែបនេះមិនត្រូវបានប្រកាសទេ។  ចំណែកសេតវិមាន និងក្រសួងការបរទេសសហរដ្ឋអាមេរិក បានបដិសេធមិនធ្វើអត្ថាធិប្បាយទេជុំវិញរឿងនេះ៕