ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទ (១៨ វិច្ឆិកា) នេះថា មេដឹកនាំកូរ៉េខាងជើង លោក គីម ជុងអ៊ុន បានជំរុញឱ្យយោធារបស់ទីក្រុងព្យុងយ៉ាង បង្កើនសមត្ថភាពការប្រយុទ្ធរបស់ខ្លួនក្នុងសម្រាប់ធ្វើសង្រ្គាម នៅក្នុងសុន្ទរកថាកាលពីសប្តាហ៍មុន បន្ទាប់ពីប្រទេសនេះបានបញ្ជូនកងទ័ពរាប់ពាន់នាក់ទៅកាន់រុស្ស៊ី។

លោក គីម បានថ្លែងនៅក្នុងសុន្ទរកថាទៅកាន់សន្និសីទរបស់មេបញ្ជាការកងវរសេនាតូច និងគ្រូនយោបាយ ដែលបានធ្វើឡើងនៅទីក្រុងព្យុងយ៉ាងកាលពីថ្ងៃសុក្រសប្ដាហ៍មុន ក្នុងអំឡុងពេលដែលលោកអំពាវនាវឱ្យមានការកសាងកម្លាំងនយោបាយ និងយោធា ព្រមទាំងប្រសិទ្ធភាពប្រយុទ្ធ ដើម្បីធានាថាកងកម្លាំងប្រដាប់អាវុធអាចទប់ទល់នឹងសង្គ្រាមបាន។

លោក គីម បានលើកឡើងថា ការគំរាមកំហែងពីសហរដ្ឋអាមេរិក និងសម្ព័ន្ធមិត្តរួមទាំងកូរ៉េខាងត្បូង និងការប្រឈមមុខដាក់គ្នាផ្នែកយោធារបស់ពួកគេជាមួយកូរ៉េខាងជើង បាននាំភាពតានតឹងឱ្យឡើងដល់ "ដំណាក់កាលដ៏អាក្រក់បំផុតក្នុងប្រវត្តិសាស្ត្រ" ដោយលោកបានហៅឧបទ្វីបកូរ៉េថាជា "ចំណុចក្តៅបំផុតរបស់ពិភពលោក" ។

មេដឹកនាំកូរ៉េខាងជើងរូបនេះបានសង្កត់ធ្ងន់នូវការរួបរួមគ្នារបស់យោធាសម្រាប់ភាពប្រសើរឡើងគួរឱ្យកត់សម្គាល់ និងជាមូលដ្ឋាន ក្នុងការពង្រឹងសមត្ថភាពរបស់ពួកគេសម្រាប់ការប្រយុទ្ធប្រឆាំងនឹងសង្រ្គាមជាក់ស្តែង"៕